Адваката Міколы Статкевіча і блогера Змітра Казлова пазбавілі ліцэнзіі
20- 24.02.2021, 19:30
- 3,820
Уладзімір Сазанчук заявіў, што не здзіўлены гэтай пастановай.
Сайту Charter97.org стала вядома, што сёння быў пазбаўлены ліцэнзіі адвакат блогера Змітра Казлова (Шэрага ката) і апазіцыйнага палітыка Міколы Статкевіча Уладзімір Сазанчук.
– Дысцыплінарная камісія менскай гарадской калегіі адвакатаў, то-бок мае калегі, разгледзела накіраванае супраць мяне дысцыплінарнае прадстаўленне. Гэтае прадстаўленне нарадзілася на падставе ліста кіраўніка Следчага камітэта Івана Наскевіча, – расказаў нам Уладзімір Сцяпанавіч.
Як бы дзіўна ні гучала, адваката пазбавілі ліцэнзіі за тое, што ён адмовіўся падпісаць падпіску пра неразгалошванне ў справе блогера Змітра Казлова і тым самым «парушыў ягонае права на абарону»:
– Калі пастанова пачне дзеянне, я далей не змагу абараняць Змітра Казлова і Міколу Статкевіча.
Уладзімір Сазанчук абсалютна не здзіўлены гэтай пастановай і не трымае зла на калегаў:
– Увогуле, сітуацыя прагназаваная, усе ўсё разумеюць. Сказалі, што дойдуць да ўсіх, вось і да мяне дайшлі.
Размову з сайтам Charter97.org Уладзімір Сазанчук скончыў словамі: «Жыве Беларусь!»
Нагадаем, Міколу Статкевіча і Змітра Казлова арыштавалі за ўдзел у несанкцыянаваных масавых мерапрыемствах, аднак пасля заканчэння тэрміну пакарання не выпусцілі, абвясціўшы падазраванымі ў рамках «справы Ціханоўскага» паводле ч. 1 арт. 342 КК (падрыхтоўка дзеянняў, што груба парушаюць грамадскі парадак).
Праваабаронцы прызналі абодвух палітвязнямі.