Еўракамісія прапанавала падоўжыць бясплатны роўмінг у ЕЗ на 10 гадоў

ЕЗ пагадзіўся скасаваць плату за роўмінг у межах Еўразвязу ў 2017 годзе.

Еўрапейская камісія прапанавала падоўжыць правілы карыстання мабільнымі паслугамі ва ўсіх еўрапейскіх краінах без дадатковых выдаткаў яшчэ на 10 гадоў.

Як паведамляе "Еўрапейская праўда", пра гэта гаворыцца ў заяве на сайце ЕК.

ЕЗ пагадзіўся скасаваць плату за роўмінг у межах Еўразвязу ў 2017 годзе. Палітыка, якая распрацоўвалася 13 гадоў, была абвешчаная інстытутамі як доказ каштоўнасці ЕЗ для сваіх грамадзянаў. Але дзеянне гэтых правілаў павінна скончыцца ў 2022 годзе.

"У той час, калі неабавязковыя падарожжы не рэкамендуюцца, гэта з'яўляецца важным дзеяннем у падрыхтоўцы светлай будучыні. Новы рэгламент прадоўжыць дзейныя правілы, якія павінны скончыцца ў 2022 годзе, яшчэ на 10 гадоў. Гэта таксама забяспечыць лепшыя паслугі роўмінгу для падарожнікаў", – гаворыцца ў паведамленні.

Прапанова Камісіі пра прадаўжэнне дзеяння нормаў мае патрэбу ва ўхваленні нацыянальных урадаў і Еўрапейскага парламента.

Новая прапанова таксама ўключае патрабаванне, каб людзі, якія карыстаюцца паслугамі мабільнай сувязі ў іншай еўрапейскай краіне, мелі права "на такую самую якасць і хуткасць сваёй мабільнай сеткі", як дома.