Кожнаму жыхару Ганконга дадуць па $645 даляраў, каб стымуляваць спажыванне

Мера звязаная з жаданнем ажывіць эканоміку ва ўмовах пандэміі.

Улады Ганконга выдаткуюць больш за 120 млрд ганконжскіх даляраў ($15,5 млрд) у гэтым фінансавым годзе, каб стымуляваць эканоміку, якая ўжо два гады знаходзіцца ў рэцэсіі. Пра гэта паведаміў тэлеканал CNBC.

«Эпідэмія [каранавіруса] ўсё яшчэ з намі, і эканоміцы трэба пераадолець рэцэсію», - сказаў міністр Ганконга ў фінансавых пытаннях Пол Чан. Паводле ягоных слоў, за мінулы год эканоміка мегаполіса скарацілася на 6,1% - гэта рэкорднае падзенне за ўсю гісторыю назіранняў.

Пандэмія нанесла сур'ёзны ўдар па эканоміцы адмысловага адміністрацыйнага раёна КНР і выклікала шмат нявызначанасцяў для бізнэсу. Пры гэтым Ганконг уступіў у стадыю рэцэсіі яшчэ ўвосень 2019 года праз масавыя антыўрадавыя пратэсты.

Чан назваў галоўнымі задачамі ўрада стрымліванне эпідэміі каранавіруса і прасоўванне праграмы вакцынацыі, «каб людзі і бізнэс змаглі стаць на ногі».

У рамках падтрымкі эканомікі ўрад Ганконга будзе штомесяц на працягу пяці месяцаў выдаваць усім жыхарам старэйшым за 18 гадоў па купоне наміналам на 1000 ганконжскіх даляраў - у суме гэта складзе блізу $645. Ваўчары могуць быць выкарыстаны толькі праз электронныя аплатныя інструменты з мясцовымі прадаўцамі, удакладняе Hong Kong Free Press.

Дапамогу атрымаюць амаль 7,2 мільёна чалавек, а яе сума ацэньваецца на $4,6 млрд. З моманту пачатку пандэміі каранавіруса ў Ганконгу пры насельніцтве 7,9 мільёна чалавек 10 890 перахварэлі інфекцыяй, 197 чалавек памерлі.

У лютым мінулага года ўлады Ганконга ўжо звярталіся да прамой падтрымкі жыхароў, прыняўшы пасатнову выдаць па 10 тысяч ганконжскіх даляраў ($1200). Гэтая мера таксама была разлічаная на стымуляцыю спажывецкага попыту, які панізіўся праз пандэмію і абмежавальныя захады.