Адвакат: Віктару Бабарыку не паведамілі аб перапынку ў ягонай справе ў судзе

Дзмітрый Лаеўскі заявіў, што экс-банкір застаецца свабодным нават у турме.

Экс-банкіра і экс-прэтэндэнта на пасаду прэзідэнта Беларусі Віктара Бабарыку не паставілі ў вядомасць аб перапынку паводле ягонай справы ў судзе, паведаміў у сваім Telegram-канале адвакат Дзмітрый Лаеўскі.

Абаронца сёння наведаў Бабарыку ў СІЗА КДБ. «Выявілася, што яму нават не паведамлялі аб перапынку ў судзе. Даведаўшыся пра прычыны перапынку, ён таксама здзівіўся, чаму не задзейнічаны запасны суддзя або народны засядацель, якія былі абвешчаныя ў першы дзень пасяджэння. Яшчэ пагаварылі аб канспіралогіі і інфармацыйных выкідах, пасмяяліся», - адзначыў ён.

Са слоў Лаеўскага, ягоны падабаронны выдатна трымаецца: «Ні прапаганда, ні сфабрыкаваныя абвінавачванні, ні арышт сына і блізкіх людзей, ні пагроза канфіскацыі маёмасці, ні восем месяцаў зняволення - нішто не зламала волю чалавека, ён застаецца свабодным нават у турме, з ясным розумам і верай у дабро».