Навукоўцы раскрылі адну з таямніц мамантаў і іншай мегафаўны

Апублікаванае даследаванне нямецкіх спецыялістаў.

Маманты і іншыя прадстаўнікі мегафаўны, што жылі ў Паўночнай Амерыцы ў канцы плейстацэну, зніклі праз кліматычныя змены, а не ў выніку прыходу на кантынент людзей. Да такой высновы прыйшлі навукоўцы з Нямеччыны, якія апублікавалі артыкул у выданні Nature Communications, піша lenta.ua.

Паўночная Амерыка калісьці была населеная мноствам буйных звяроў - у познім плейстацэне на кантыненце блукалі гіганцкія ляніўцы і бабры, велізарныя гліптадоны, мастадонты і маманты. Аднак большая частка паўночнаамерыканскай мегафаўны знікла амаль 12 тысяч гадоў таму. Як лічылася да нядаўняга часу, мегафаўну вынішчылі людзі, але нямецкія навукоўцы ўсталявалі, што ўся справа ў змене клімату.

Справа ў тым, што ў канцы плейстацэну, гэта значыць, блізу 12,8 тысяч гадоў таму, кліматычная тэндэнцыя змянілася з пацяплення, якое працягвалася некалькі тысяч гадоў, на пахаладанне. Ледавіковая фаза, якая прыпала на позні дрыяс, стала апошнім значным пахаладаннем у гісторыі нашай планеты. Супрацоўнікі Інстытута хімічнай экалогіі Макса Планка ў Ене ўжылі новы статыстычны метад для таго, каб давесці, што паўночнаамерыканская мегафаўна вымерла праз пахаладанне ў познім дрыясе, а не праз празмернае паляванне.

«Мадэляванне, заснаванае на радыёвугляродным датаванні падзей, паказала, што колькасць буйных жывёл у Паўночнай Амерыцы змянялася ў адказ на кліматычныя змены. Калі 12,8 тысячы гадоў таму пачалося пахаладанне, колькасць мегафаўны стала зніжацца, што ў канчатковым выніку прывяло да вымірання», - кажа Крыстафэр Карлтон, адзін з аўтараў навуковай працы.