У Хабараўску затрыманы самы багаты паводле дэкларацый расейскі дэпутат

Афіцыйна дэпутат валодае кампаніяй «Монерон» - найбуйнейшым здабытчыкам краба ў РФ.

У Хабараўску паліцыя затрымала дэпутата Сахалінскай абласной думы, Дзмітрыя Пашова. Яму могуць быць выстаўленыя абвінавачванні паводле крымінальных спраў супраць прадпрымальніка Алега Кана, якога СМІ называюць крабавым каралём Расеі. Пашоў - афіцыйна самы багаты дэпутат у Расеі. У 2020 годзе ён задэклараваў 6 мільярдаў 225 мільёнаў рублёў даходу, паведамляе svoboda.org.

Пра затрыманне дэпутата паведаміла выданне Sakh.com, сцвярджаецца, што ў Хабараўску ён знаходзіцца ў камандзіроўцы. Выданне мяркуе, што ён можа быць адпраўлены ў СІЗА Хабараўска, а затым пераведзены на Сахалін. Афіцыйнага пацвярджэння гэтай інфармацыі няма, аднак аналагічныя паведамленні з'явіліся ў іншых выданнях.

Паводле афіцыйных звестак, дэпутат валодае кампаніяй «Монерон», найбуйнейшым здабытчыкам краба ў Расеі. Аднак Следчы камітэт уважае сапраўдным уладальнікам кампаніі Кана. Той падазраецца ў датычнасці да забойства і кантрабандзе крабаў на суму больш за 210 мільёнаў рублёў. Пасля распачынання спраў Кан усе свае актывы перапісаў на Пашова.

Кан і Пашоў звязвалі справу з перадзелам рынку здабычы краба ў Расеі. Долю ў кампаніі спрабавала купіць тэлевядоўца Ксенія Сабчак, яе маці - сенатар Людміла Нарусова звярталася ў Вярхоўны суд, калі Сахалінскі суд фактычна заблакаваў угоду.

На Сабчак і Нарусову паралельна пачалася інфармацыйная атака ў тэлеграм-каналах. Яна выказала здагадку, што з ёй можа быць звязаны ўладальнік, які ўдзельнічае ў крабавым бізнэсе «Рускай рыбопромышленной кампаніі» Глеб Франк, зяць сябра Пуціна Генадзя Цімчанкі. Прадстаўнік бізнэсоўца заявіў РБК, што гэта не так.