Рэкорд за 14 гадоў: дзірка ў бюджэтах расейскіх рэгіёнаў нарастае
3- 27.02.2021, 19:30
- 4,252
Сумарны дэфіцыт рэгіянальных дзяржаўных фінансаў склаў сотні мільярдаў расейскіх рублёў.
Крызісны 2020 год расейскія рэгіёны завяршылі з рэкорднай за 14 гадоў дзіркай у кансалідаваным бюджэце. 57 з 85 суб'ектаў патрацілі больш, чым атрымалі ў выглядзе даходаў, пры тым што год таму такіх было 35, а ў 2018-м годзе - усяго 15, піша sprotyv.info.
Сумарны дэфіцыт рэгіянальных дзяржаўных фінансаў склаў 677 млрд рублёў і ў абсалютных лічбах стаў максімальным з 2006 года, падлічылі экспэрты расейскага Цэнтра развіцця ВШЭ.
У адносным выражэнні - 0,62% ВУП - дзірка ў бюджэце суб'ектаў стала рэкорднай з 2013 года. У 15 рэгіёнаў дэфіцыт мясцовай казны перавысіў 10% уласных даходаў, а ў сямі - быў вышэй за 20%.
Эпіцэнтрам «бедства» стала Кемераўская вобласць з «дзіркай» амаль у 30% уласных падатковых і непадатковых збораў. Амаль чвэрці паступленняў не хапіла Удмуртыі, больш за 20% - Хакасіі, Цюменскай, Архангельскай вобласці, Рэспубліцы Калмыкія і Башкартастану.
Паводле абсалютнай велічыні самы вялікі дэфіцыт у 2020 годзе - 136 млрд рублёў, сфармаваўся ў Маскве.
Лідарамі ў скарачэнні ўласных даходаў сталі, перш за ўсё, рэгіёны з сыравіннай скіраванасцю эканомікі, адзначаюць экспэрты. Праз падзенне коштаў на вуглевадароды гэтыя рэгіёны сутыкнуліся з рэзкім падзеннем паступленняў падатку на прыбытак.
На 24% абрынуліся паступленні ў бюджэт у Цюменскай вобласці і Ненецкай аўтаномнай акрузе; амаль 16% недалічыліся ЯНАА і Комі. Больш за 12% страцілі Кемераўская, Астраханская і Архангельская вобласці, Татарстан, Пермскі край, Удмуртыя і Башкартастан.
Уласныя даходы скараціліся ў 32 суб'ектаў РФ, але ў суме паступленні ў кансалідаваны бюджэт засталіся на ўзроўні 2019 года - 11,125 трлн рублёў.
Прасадку ў падатку на прыбытак (-12,8%) суб'екты кампенсавалі ўдарнымі зборамі НДФЛ (+ 7,5%) і акцызаў (+ 5,7%). Адбілася павышэнне акцызаў на піва, а таксама павелічэнне долі рэгіёнаў у збіраных акцызах на гаруча-змазачныя матэрыялы.
На плечы рэгіянальных уладаў у РФ лёг асноўны цяжар выдаткаў на пандэмію, і менавіта гэта стала прычынай бюджэтнай катастрофы на ўзроўні суб'ектаў. Фінансаванне аховы здароўя паводле вынікаў года ўзляцела на 71%, а сацыяльных праграм - на 23%. Гэта павялічыла расходную частку рэгіянальных бюджэтаў на 11% - да 15,578 трлн рублёў.
Разрыў паміж уласнымі даходамі і расходамі ў суб'ектаў дасягнуў 4,453 трлн рублёў. Аднак значную частку гэтай сумы кампенсаваў федэральны цэнтр, што вылучыў у выглядзе датацый, субсiдый, субвенцый і трансфертаў 3,776 трлн. рублёў - у 1,5 разы больш, чым годам раней. Пакінуты дэфіцыт рэгіёны прафінансавалі за кошт запазычанасці, якая вырасла на 390 млрд рублёў, а таксама праядаючы назапашаныя рэзервы. Рэшткі на рахунках суб'ектаў за год скараціліся на 290 млрд рублёў.
На выдаткі рэгіёнаў у 2021 годзе будуць аказваць уплыў тыя ж фактары, што і ў 2020-м, у тым ліку: пандэмія каранавіруса, неабходнасць дадаткова падтрымліваць насельніцтва і бізнэс, кажуць экспэрты. Але ранейшай дапамогі з Масквы ўжо не будзе: федэральны бюджэт скарачае трансферты на 25%. У выніку многія рэгіёны будуць у больш складаным фінансавым становішчы, чым у 2020 годзе, бо рэзервы, які былі на рахунках, ужо выдаткаваныя.