Навукоўцы высветлілі, што каранавірусныя локдаўны прывялі да пацяплення на Зямлі

Пандэмія COVID-19 паўплывала на клімат.

Спецыялісты Нацыянальнага цэнтра атмасферных даследаванняў (NCAR, ЗША) высветлілі, што зніжэнне сацыяльнай актыўнасці і локдаўны, уведзеныя праз пандэмію COVID-19, прывялі да нагрэву паверхні Зямлі ў 2020 годзе, гаворыцца ў публікацыі на партале навуковай і тэхнічнай інфармацыі phys.org.

«Адбылося значнае зніжэнне выкідаў з найбольш забруджвальных галін прамысловасці, і гэта спарадзіла неадкладнае, кароткатэрміновае ўздзеянне на тэмпературу», - прыводзяцца ў паведамленні словы вядучага аўтара даследавання, навукоўца з NCAR Эндру Гетэльмана.

Паводле інфармацыі спецыялістаў, гэта адбылося праз скарачэнне выкідаў аэразоляў, якія блакуюць паступленне сонечнага святла: калі выкіды аэразоляў зменшыліся мінулай вясной, большая частка сонечнага цяпла дасягнула планеты, асабліва ў прамысловых краінах, такіх як Злучаныя Штаты і Расея, якія звычайна выкідваюць шмат аэразоляў у атмасферу.

Тэмпература над часткамі зямной паверхні мінулай вясной была прыкладна на 0,1-0,3 градуса Цэльсія вышэйшай, чым можна было б чакаць, зыходзячы з пераважнага надвор'я.

«Гэты эфект быў найбольш выяўлены ў рэгіёнах, якія звычайна звязаныя са значнымі выкідамі аэразоляў, прычым пацяпленне дасягнула прыкладна 0,7 градуса F (0,37 С) на большай частцы тэрыторыі Злучаных Штатаў і Расеі», - сказана ў публікацыі.

У новым даследаванні падкрэсліваецца складаны і часта супярэчлівы ўплыў розных тыпаў выкідаў ад электрастанцый, аўтамабіляў, прамысловых аб'ектаў і іншых крыніц. У той час як аэразолі маюць тэндэнцыю асвятляць воблака і адлюстроўваць цяпло ад Сонца назад у космас, вуглякіслы газ і іншыя парніковыя газы маюць супрацьлеглы эфект, затрымліваючы цяпло зблізку паверхні планеты і павялічваючы тэмпературу.

Нягледзячы на кароткатэрміновыя наступствы пацяплення, Гетэльман падкрэсліў, што доўгатэрміновае ўздзеянне пандэміі можа адбіцца на нязначным запаволенні змены клімату праз зніжэнне выкідаў вуглякіслага газу, які захоўваецца ў атмасферы цягам дзясяцігоддзяў і больш паступова ўплывае на клімат.

Аэразолі, наадварот, уздзейнічаюць больш непасрэдна, уздзеянне знікае цягам некалькіх гадоў, адзначаюць навукоўцы.

Эфект пацяплення быў найбольш моцным у сярэдніх і верхніх шыротах паўночнага паўшар'я і параўнальна нязначным у большай частцы паўднёвага паўшар'я, дзе аэразольныя выкіды не так распаўсюджаныя.

Акрамя навукоўцаў NCAR, у даследаванні ўдзельнічалі спецыялісты з Оксфардскага ўніверсітэта, Імперскага каледжа Лондана і Універсітэта Лідса (Вялікая Брытанія).