Беларускія ўлады самі «зліваюць» кантракт «Беларуськалія» з нарвежскай кампаніяй Yara?

Перад чарговым раўндам перамоваў былі затрыманыя сябры страйкаму салігорскага прадпрыемства.

Нішто так сімвалічна не ілюструе бліскучую адзіноту беларускіх уладаў, як справаздача Мінфіна пра стан дзяржаўнай пазыкі за студзень, піша Telegram-канала «Лісты да дачкі».

Я нават не пра тое, што яны прывабілі з-за мяжы ўсяго 35 мільёнаў. У мінулым студзені было ў два разы больш, але ўсякае ж бывае. Студзень да студзеня не падобны. Я пра спіс знешніх крэдытораў, які складаецца роўна з двух пунктаў.

Зразумела, што ніхто не чакаў убачыць у гэтым спісе ЕБРР, ЕЗ або Еўрапейскі інвестыцыйны банк. Яны не разумеюць нацыянальную псіхалогію беларускіх уладаў і грошай даўно ўжо не даюць.

Але там жа няма і крэдытаў ад стратэгічнага брата з далёкай дугі. У сэнсе Кітая. Кітайскія банкі выдаюць крэдыты кітайскім кампаніям, каб тыя пастаўлялі ў Беларусь кітайскае абсталяванне або будавалі тут што-небудзь карыснае для Кітая. У тым жа Вялікім камені, напрыклад. Не тое каб гэта былі велізарныя грошы, але некалькі мільёнаў кожны месяц капала. У снежні ўвогуле капнула 35 мільёнаў. А ў студзені, атрымліваецца, Кітай ужо беларускім Вялікім каменем не надта цікавіўся.

Але добра, Кітай. У беларускіх уладаў нібыта ёсць браты і бліжэйшыя. Дык вось, у радку, дзе звычайна пісалі «крэдыты ўрада і банкаў Расейскай Федэрацыі», засталіся словы толькі пра ўрад. Ад яго беларускім уладам дасталася 25 мільёнаў. Гэта якраз грошы, якімі Расея крэдытуе будаўніцтва атамнай станцыі. А брацкія банкі, атрымліваецца, сябе неяк не вельмі па-братэрску паводзілі.

Ты ж памятаеш, што сёлета ўладам трэба плаціць знешнія пазыкі – больш за тры мільярды. Вось у студзені яны 35 мільёнаў прывабілі, а 270 мільёнаў, як ты памятаеш, заплацілі. А акрамя трох мільярдаў дзяржаўнай пазыкі ёсць жа яшчэ 158 мільярдаў рублёў пазык прадпрыемстваў, якія, шчыра кажучы, ад дзяржаўных мала чым адрозніваюцца. У сэнсе, усё адно за іх цяпер Мінфін плаціць. А ты ж у курсе, што здольнасць Мінфіна знаходзіць грошы зваротна прапарцыйная здольнасці міліцыі знаходзіць сваіх схаваных нядобразычліўцаў.

І вось, пакуль Мінфін не можа знайсці грошы, беларуская міліцыя паспяхова знаходзіць новыя падставы для арыштаў. Тыдзень таму гэта была прысутнасць на канцэрце, потым чытанне ў электрычцы, а ў суботу ўжо вечарынка на асабістым падворку. Цяпер на чарзе, мабыць, затрыманне фанатаў за адсутнасць на футбольных матчах без паважных прычынаў.

Напэўна, ва ўсіх гэтых бліскучых спецаперацыях беларускіх спецслужбаў ёсць глыбокі для іх стратэгічны сэнс. Але мне ў галаву нешта прыходзіць толькі прыказка пра альтэрнатыўна адораных, якім не варта выконваць агульнапрынятыя рэлігійныя рытуалы, каб унікнуць нанясення сабе лёгкіх цялесных пашкоджанняў.

Вось тут некаторыя пытаюцца: а навошта ж улады арыштавалі чальцоў страйкаму Беларуськалія якраз перад чарговым раўндам перамоваў з Yara? Ды на тое, што ў іх у галаве гэтыя два факты не стыкуюцца і ўвогуле праходзяць у розных установах. Гэта Беларуськалію трэба заключаць кантракт з Yara, а Мінфіну здабываць грошы на рэфінансаванне знешняй пазыкі. А міліцыі трэба выконваць план у затрыманых.

І вось хто ў нас у краіне цяпер найгалоўнейшы? Усякія Беларуськаліі з мінфінамі ці міліцыя? Чые інтарэсы важнейшыя? Не адказвай. Гэта было рытарычнае пытанне.