Дзве траціны расейцаў уважаюць каранавірус за біялагічную зброю

Канспіралогія правіць баль у масавай свядомасці расейцаў.

Большасць расейцаў мяркуюць, што каранавірус, які стаў прычынай глабальнай пандэміі, быў «створаны штучна» і з'яўляецца «формай біялагічнай зброі», піша finanz.ru.

Падчас апытання, праведзенага ў лютым, такую прычыну паходжання інфекцыі назвалі 64% рэспандэнтаў, высветлілі сацыёлагі «Левада-цэнтра» (прызнаны інагентам пастановай Мінюста РФ).

У натуральнае паходжанне віруса, паводле даследавання, вераць менш за чвэрць насельніцтва (23%), тады як 13% адказаць «не змаглі».

«Версія аб штучным паходжанні дамінуе ва ўсіх узроставых групах», - канстатуе «Левада»: яе выбралі 49% моладзі (18-24 гады), 62% апытаных ва ўзросце 25-39 гадоў; 71% сярод тых, каму ад 40 да 55 гадоў, і 64-65% прадстаўнікоў старэйшага пакалення.

Хоць канспіралогія правіць баль у масавай свядомасці расейцаў, страх перад хваробай адступае. У лютым толькі 43% заявілі, што баяцца заразіцца каранавірусам супраць 64% на кастрычнік. Зафіксаваны паказчык стаў мінімальным з сакавіка мінулага года.

Пры гэтым 28% апытаных асабіста не ведаюць нікога, хто хварэў на каранавірус. 17% хварэлі або самі, або бачылі, як перахварэў хтосьці з іх сямейнікаў. У 22% хварэлі блізкія сваякі (акрамя тых, хто жыве з імі) або сябры і суседзі. Яшчэ 42% асабіста ведаюць людзей, якія хварэлі на каранавірус - калегі, знаёмыя.

Нягледзячы на масаваную піяр-кампанію прасоўвання вакцыны «Спадарожнік V», жаданне прышчапляцца ў расейцаў прадаўжае зніжацца.

У лютым доля гатовых зрабіць укол расейскім прэпаратам абрынулася да 30% - мінімуму з моманту рэгістрацыі вакцыны. Колькасць «адмоўнікаў» вырасла да 62%.

Сярод іх 37% патлумачылі сваю пастанову страхам перад «пабочнымі эфектамі», а 30% заявілі, што хацелі б дачакацца заканчэння ўсіх выпрабаванняў. Доля такіх адказаў у параўнанні са снежнем вырасла на 8 адсоткаў і 7 адсоткаў адпаведна.

Да канца лютага прышчэпку ў Расеі зрабілі 4 млн грамадзян, паведаміў на мінулым тыдні загадчык кафедры эпідэміялогіі і доваднай медыцыны Сечанаўскага ўніверсітэта, галоўны пазаштатны эпідэміёлаг Міністэрства аховы здароўя Расеі, акадэмік РАН Мікалай Брыко.

Гэта ў 12 разоў менш, чым у ЗША, дзе, паводле слоў прэзідэнта Джо Байдэна, прышчэплена 50 млн чалавек.

Са слоў віцэ-прэм'ера Таццяны Голікавай, цяпер у Расеі выраблена амаль 11,1 млн доз вакцыны, у ліпені будзе выраблена да 88 млн доз.