Пашынян папрасіў у народа Арменіі прабачэння за свае памылкі
19- 1.03.2021, 18:52
- 4,258
Палітычны крызіс у Арменіі пачаўся на фоне супрацьстаяння прэм'ера з вайскоўцамі.
У Ерэване на плошчы Рэспублікі пачаўся мітынг прыхільнікаў прэм'ера краіны Нікола Пашыняна, паведамляе РБК. Кіраўнік урада асабіста звярнуўся да людзей і папрасіў у іх прабачэння.
Натоўп запоўніў амаль усю плошчу Рэспублікі. Пашынян выйшаў да сваіх прыхільнікаў з будынка ўрада разам з жонкай у асяроддзі аховы, натоўп сустрэў яго крыкамі: «Нікол, Нікол!»
«За 30 гадоў незалежнасці былі дапушчаныя ўсе магчымыя памылкі. За апошнія два гады і дзесяць месяцаў пасля рэвалюцыі таксама былі зробленыя памылкі. Гаворка [ідзе] аб нашым урадзе, гаворка асабіста аба мне. І я хачу ва ўсіх вас, ва ўсіх грамадзян Арменіі, ва ўсіх армян дыяспары, ва ўсіх грамадзян Арцаха папрасіць прабачэння», - звярнуўся ён да людзей.
У той жа час Пашынян пацвердзіў, што мае намер працягнуць дамагацца адстаўкі кіраўніка Генштаба Аніка Гаспарана, і назваў яе непазбежнай. «Заява Генштаба ВС (у якой ён запатрабаваў адстаўкі Пашыняна. - Заўвага.) абсалютна незаконная, бо Канстытуцыя дакладна вызначае нейтралітэт узброеных сілаў у палітычных пытаннях. Начальнік Генштаба прытрымліваецца выразна выяўленай палітычнай арыентацыі і тым самым парушае ўсе правілы і Канстытуцыю Арменіі», - заявіў прэм'ер.
Палітычны крызіс у Арменіі пачаўся на фоне супрацьстаяння прэм'ера з вайскоўцамі. 24 лютага Пашынян заявіў, што расейскія ракетныя комплексы «Іскандэр», якія былі на ўзбраенні армянскага войска, «спрацавалі толькі на 10%». Словы Пашыняна зняпраўдзіў намеснік начальніка Генштаба Ціран Хачатран, пасля чаго яго адправілі ў адстаўку. На наступны дзень Генштаб Узброеных сіл Арменіі апублікаваў заяву, у якім запатрабаваў неадкладнай адстаўкі Пашыняна ў сувязі з няздольнасцю «прымаць адэкватныя пастановы».