Беларусы заклікалі да байкоту «Славянскага базару»: хто з артыстаў адмовіўся
30- 29.03.2021, 16:37
- 44,222
У сацсетках выканаўцаў сотні каментароў.
«Славянскі базар» звычайна абмяркоўваюць летам — калі ён і праводзіцца. А сёлета Віцебскі фэст, які пройдзе 14-19 ліпеня, нечакана трапіў у навіны задоўга да пачатку. Беларусы пішуць паведамленні артыстам, чые прозвішчы з'явіліся ў афішы на сайце фестывалю. Яны просяць зорак не прыязджаць на «Славянскі базар» падчас палітычнага крызісу ў Беларусі. Некаторыя выканаўцы ўжо адказваюць прыхільнікам, што не збіраюцца выступаць у Віцебску. TUT.BY папрасіў пракаментаваць сітуацыю дырэкцыю фестывалю, але адказу на свае пытанні не атрымаў.
Сярод тых, каго арганізатары «Славянскага базару» анансавалі ў папярэдняй афішы на сайце фестывалю, напрыклад, такія імёны: украінскія выканаўцы Maruv, Алег Віннік, Эліна Івашчанка, спявак з Казахстана Дзімаш Кудайберген, зорка з Грузіі Вахтанг Кікабідзэ, расейскія артысты Стас П'еха, Аляксандр Буйноў, Аніта Цой, Міхаіл Галусцян, Зара, Аліна Артц, Сяргей Пенкін, Emin, Ізраільскі джазмен Леанід Пташка.
Пасля таго, як з'явілася праграма фестывалю, віцебчукі і жыхары іншых гарадоў Беларусі сталі знаходзіць артыстаў у сацсетках, у асноўным у Instagram, і прасіць іх не прыязджаць на «Славянскі базар» — у сувязі з палітычным крызісам у Беларусі.
Некаторыя артысты пачалі адгукацца.
Міхаіл Галусцян, чыё імя ўдзень 29 сакавіка яшчэ стаіць у афішы гала-канцэрта закрыцця фестывалю 18 ліпеня, напісаў у сторыс Instagram, што не збіраўся ехаць на Віцебскі фестываль.
- Хлопцы, я наогул не ў курсе. Я не збіраўся выступаць на «Славянскім базары»! Не пішыце мне ў дырэкт і не пішыце каментары. Просьба да арганізатараў фестывалю прыбраць маё прозвішча са спісаў. Не дурыце народ! Усім міру.
У афішы канцэрта «Залаты хіт» у ноч з 16 на 17 ліпеня значацца Аляксандр Іваноў і ягоны гурт «Ронда». «Народные новости Витебска» паведамляюць, што прыхільнік з Віцебска папрасіў Іванова ў instagram не ўдзельнічаць у канцэрце фестывалю праз палітычны крызісу ў краіне і арыштаў апанентаў дзейнай улады.
- Ніхто нікуды і не збіраўся! Ніякіх «базараў…, - так адказалі беларусу ад імя афіцыйнага акаўнта Аляксандра Іванова.
Пазней там з'явіўся дадатковы тэкст:
- Часам афішы лепяць нядобрасумленныя людзі, якія потым і квіткі нядобрасумленна прадаюць на таго, хто і не ў курсе! Мы не абыякавыя да брацкага беларускага народа і яго бяды!
Аднак затым допіс у Instagram спевака, пад якім ішла гэтая перапіска, выдалілі. А віцебскі прыхільнік, які пакінуў першы каментар, цяпер там заблакаваны.
У афішы на сайце Аляксандра Іванова канцэрту ў ліпені ў Віцебску няма.
Ад удзелу ў «Славянскім базары» адмовіўся беларускі спявак Антон Табала (Homie). Пра гэта ён паведаміў у сваім Instagram.
Дырэкцыя нічога не каментуе
Дырэктару фестывалю Глебу Лапіцкаму журналістам датэлефанавацца не ўдалося.
Тады журналісты задалі пытанне прэс-службе фестывалю: як яны могуць пракаментаваць з'яўленне на афішы музыкаў, якія заяўляюць, што не ў курсе, што нібыта збіраюцца ўдзельнічаць у «базары».
І атрымалі кароткі адказ: «На гэты момант каментароў няма».
Міністр культуры: «Славянскі базар — вось гэта сапраўдныя конкурсы»
Віцебскі фестываль нязменна атрымлівае высокую ацэнку беларускіх уладаў. Так, міністр культуры Беларусі Анатоль Маркевіч у каментары ў эфіры тэлеканала АНТ пастановы аб адхіленні нашай краіны ад удзелу ў «Еўравізіі-2021», успомніў пра «Славянскі базар». Ён мяркуе, што не варта перажываць праз тое, што Беларусі сёлета не будзе на конкурсе эстраднай песні сярод краін-чальцоў Еўрапейскага саюза вяшчання.
- Вы ведаеце, я не стаў бы перажываць з гэтай нагоды. Пераадолеем мы гэтыя цяжкасці, недарэчнасці, якія ўзніклі. Таму што, на мой погляд, асабліва ў апошнія гады, конкурс «Еўравізія» стаў крыху падмяняць агульначалавечыя паняцці. Міжнародны фестываль «Славянскі базар», які кожны год пры падтрымцы кіраўніцтва краіны праводзіцца ў цудоўным горадзе Віцебску — вось гэта сапраўдныя конкурсы, вось гэта сапраўднае майстэрства. І мы ганарымся тым, што наша краіна становіцца вось такой цудоўнай пляцоўкай. А мы разумеем, напэўна, што справа, можа, не ў песні, а справа ў іншым. Час расставіць усё на свае месцы, - заявіў міністр культуры.
Нагадаем, 26 сакавіка арганізатары «Еўравізіі» паведамілі, што новая песня гурта «Галасы ЗМеста», якую прапанаваў Менск, не адпавядала правілам конкурсу, таму Беларусь не будзе ўдзельнічаць у конкурсе сёлета.
Нагадаем, 8 жніўня, перад прэзідэнцкімі выбарамі, у рэгіёнах і Менску анансавалі маштабныя святочныя канцэрты з удзелам зорак беларускай і замежнай эстрады. Усе бясплатныя. Так, у Віцебску павінен быў праспяваць Рыгор Лепс, У Гомелі — «Дыскатэка Аварыя», у Берасці — Стас П'еха, у Гародні — Леанід Агуцін, у Магілёве — Boney M, у Менску — «Адпетыя ашуканцы» і «Кар-Мэн».