Сельская гаспадарка Беларусі ўвайшла ў 2021 год з фінансавай прабоінай

У «чырвонай зоне» апынуліся аграрыі з Гомельскай і Менскай абласцей.

Чыноўнікі падвялі фінансавыя вынікі працы аграрнай галіны, паведамляе banki24.by.

У студзені 2021 года вытворчасць сельгаспрадукцыі вырасла ўсяго на 0,2%. Проста параўнайце: летась рост за студзень складаў 4,5%.

У рэгіянальным разрэзе найлепшыя паказчыкі прадэманстравала сельская гаспадарка з Берасцейскай і Гарадзенскай абласцей. На Берасцейшчыне выпуск аграрнай прадукцыі павялічыўся на 3%, на Гродзеншчыне - на 4,2%. Фактычна гэтыя дзве вобласці і выцягнулі уверх агульны індыкатар у краіне.

У «чырвонай зоне» апынуліся сельгаспрадпрыемствы з Гомельскай і Менскай абласцей. На Гомельшчыне вытворчасць упала на 7,1%, на Меншчыне ўпала на 1,4%. Пры гэтым у Гомельскай вобласці спад фіксуецца ўжо трэці год запар - у пачатку 2020 года было мінус 2,6%, на пачатку 2019 года - мінус 7,7%.

Інфармацыя пра стан фінансаў і разлікаў ідзе з месячнай затрымкай у параўнанні са звесткамі аб вытворчасці. На сёння даступныя звесткі аб сітуацыі на флагманах галіны за поўны 2020 год.

Статыстыка аб рэнтабельнасці, прыбытку і стратах для сельскай гаспадаркі публікуецца ў двух разрэзах - з улікам дзяржпадтрымкі і без яе. Бо памеры дзяржпадтрымкі вялікія, гэтыя велічыні сур'ёзна адрозніваюцца адна ад адной.

Напрыклад, у 2020 годзе рэнтабельнасць сельскай гаспадаркі ў выніку з дзяржпадтрымкай склала 6,1%, а без яе - усяго 1,4%. Да зняцця эфекту дзяржпадтрымкі дзель стратных прадпрыемстваў дасягнула 7,1%, а пасля зняцця - 49,9%.

Адпаведна, сума страт стратных аграрыяў з улікам дзяржпадтрымкі склала 242,6 млн BYN, а без яе - 532,3 млн BYN.

Для сельскай гаспадаркі характэрны высокая сума сумарных даўгоў на фоне дэбіторкі. Розніца паміж гэтымі сумамі на 1 студзеня 2021 года дасягнула 8,8 раза. На гэтую дату сумарныя пазыкі ў галіне склалі 14,9 млрд BYN, а дэбіторыка - толькі 1,699 млрд BYN.

Пры такой малой дэбіторцы, калі аграрыі збяруць грошы з усіх дэбітораў, іх будзе, мала, каб вярнуць нават 12% абавязанняў перад крэдыторамі - іншымі прадпрыемствамі, бюджэтам і банкамі.

Таксама ў сельскай гаспадарцы Беларусі даволі нізкая якасць завінавачанасці. Нягледзячы на перыядычныя спісанні, растэрміноўкі і адтэрміноўкі абавязацельстваў, удзельная вага праблемных пазык у аграрыяў склала 18,9% супраць 6,4% у сярэднім у рэальным сектары.

Найгоршая сітуацыя назіралася толькі на водным транспарце - 87,9%. Аднак у воднікаў самая сума пратэрмінаванай запазычанасці маргінальная - 7,6 мільёна BYN супраць 2,822 млрд BYN у сельскай гаспадарцы.