Беларусаў заклікалі да эканамічнага пратэсту
16- 31.03.2021, 19:56
- 23,666
Цяпер уся надзея рэжыму - толькі на нашы грошы. Мы павінны яе адабраць.
Кіраўнік НАУ Павел Латушка абвясціў пра пачатак акцыі эканамічнага пратэсту «Банкамат - абменнік - банк».
- Раней мы ўжо распавядалі пра стан беларускай эканомікі. Пасля падзей 25 і 27 сакавіка да гэтых слоў варта прыслухацца кожнаму, хто хоча наблізіць перамены ў краіне.
Дзякуючы сумленным чыноўнікам мы даведаліся пра правядзенне эканамічна неабгрунтаванай эмісіі ў другім паўгоддзі 2020 года, мэта якой - утрымаць нелегітымную ўладу на паверхні.
Плата за гэта - інфляцыя, якую спрабуюць утрымаць пастановай аб абмежаванні росту коштаў. Але эканоміка так не працуе.
Праз некалькі месяцаў прыйдзе дэвальвацыя. З'явяцца абмежаванні на валютныя аперацыі, на зняцце дэпазітаў - ці рэжым папросту пачне рабаваць нашы рахункі. Цяпер уся іх надзея - толькі на НАШЫ грошы.
Лукашэнка вельмі баіцца пратэстнай вясны. Таму што ведае - дубінкі не працуюць бясплатна, а эканоміка на краі прорвы.
А значыць - самы час нанесці рэжыму ўдар масавай акцыяй «Банкамат - абменнік - банк». Для гэтага кожнаму беларусу трэба зрабіць усяго 3 простыя крокі:
1) Адправіцца да бліжэйшага банкамата і зняць усе грошы са сваіх банкаўскіх карт. Тое ж самае паўтарыць і ў дзень заробку, стыпендыі або пенсіі.
2) Штодня пералічваць гатоўку ў валюту ў рамках сваіх магчымасцяў. Беларускіх рублёў трымаць пры сабе не больш, чым трэба на базавыя выдаткі.
3) Забраць усе свае дэпазіты з банкаў, пакуль рэжым не зрабiў гэта за вас.
Акцыя «Банкамат - абменнік - банк» - гэта тое, што сёння па сілах кожнаму. Кожнаму, хто хоча перамен.
Адначасовы нарастаючы эканамічны і вулічны пратэст супраць фашысцкай хунты - гэта самы правільны падарунак, які мы ўсе павінны зрабіць Беларусі напярэдадні Дня Перамогі.
Час дзейнічаць! - рэзюмаваў Латушка.