Bloomberg: Трамп збіраецца ўдзельнічаць у выбарах 2024 года без Пэнса

Дарадцы экс-прэзідэнта ЗША прапануюць яму, каб патэнцыйны віцэ-прэзідэнт быў цемнаскурым ці жанчынай.

Былы прэзідэнт ЗША Дональд Трамп абярэ іншую кандыдатуру на ролю віцэ-прэзідэнта, калі возьме ўдзел у выбарах 2024 года.

Пра гэта паведамляе Bloomberg.

Крыніцы выдання адзначаюць, што Дональд Трамп у асабістых гутарках з іншымі прадстаўнікамі Рэспубліканскай партыі заявіў, што хоча мець побач тых, хто да канца падтрымліваў яго.

Таксама крыніца ў партыі адзначыла, што дарадцы Трампа прапануюць яму, каб патэнцыйны віцэ-прэзідэнт быў цемнаскурым ці жанчынай.

Інфармацыю пра тое, што кандыдатура Пэнса дакладна не будзе разглядацца пацвердзілі тры крыніцы сярод рэспубліканцаў.

18 лютага Трамп заяўляў, што яшчэ не гатовы дакладна сказаць, ці будзе балатавацца ў прэзідэнты ў 2024 годзе.

У той жа час, на канферэнцыі рэспубліканцаў 28 лютага Трамп заявіў, што зможа атрымаць перамогу на выбарах «трэцім разам». Ён паўтарыў перакананне, што перамог на прэзідэнцкай гонцы ў 2020 годзе.