Чаму ў Беларусі руйнуюцца гандлёвыя сеткі?

Перасталі функцыянаваць усе крамы гандлёвых сетак Bigzz і «Скарбонка» - кампанія ліквідаваная.

Раней паведамлялася аб праблемах у гандлёвых сетках Green, «Святлафор», а таксама сеткі «Хатні» - рытэйлер спыніў разлікі за пастаўленую прадукцыю.

Udf.by пацікавіўся, што адбываецца з беларускім рытэйлам, ці варта шукаць у праблемах гандлёвых сетак нешта агульнае?

«Гандаль пачынае зводзіць канцы з канцамі»

Доктар эканамічных навук Барыс Жаліба адзначыў, што гандлёвыя сеткі перажываюць чарговы этап развіцця.

«У мінулым гандлёвыя сеткі раслі на шкоду інтарэсам невялікіх прыватных крамаў, якія саступалі ім у канкурэнцыі ў асартыменце і цэнах. Выжылі ў асноўным крамы прыватнікаў «у крокавай даступнасці». Прысутнасць гандлёвых сетак расла, як і канкурэнцыя паміж імі, і цяпер ідзе новы этап: больш паспяховыя гандлёвыя сеткі пачынаюць ціснуць на менш паспяховыя і паглынаць іх», - сказаў Жаліба.

Ён мяркуе, што сетка Bigzz саступіла ў канкурэнцыі.

«Крама гэтай сеткі побач з маім домам. Нават вонкава там былі невялікія чэргі ў параўнанні з іншымі крамамі, асартымент пакідаў жадаць лепшага. Таму нядзіўна, што сетка можа знікнуць, як некалі быў паглынуты «Рублёўскі», - сказаў Жаліба.

У іншых гандлёвых сетак маглі быць іншыя прычыны праблем.

«Напрыклад, Green згадаў на Усебеларускім сходзе Лукашэнка, які сказаў, што сетка мала гандлюе беларускай прадукцыяй», - нагадаў Жаліба.

Але бачыць ён і агульныя прычыны праблем у прыватных гандлёвых сетках.

«Агульнае, напэўна, ёсць: гандаль пачынае зводзіць канцы з канцамі. Эканамічная сітуацыя ў краіне вядомая, рэнтабельнасць гандлю ў нас невысокая, з боку пакупнікоў ёсць зніжэнне попыту. І, напэўна, пачынае адбівацца новае стаўленне Лукашэнкі да прыватнага бізнэсу. Ён даў на УНС імпульс: «выразаць» гандаль, які не адпавядае патрабаванням уладаў», - мяркуе Жаліба.

Улады заклапочаныя тым, што беларусы набываюць менш айчынных прадуктаў. Ці ёсць тут віна буйных гандлёвых сетак?

«У Беларусі заўсёды былі нормы, якія ўстанаўліваюць адсотак тавараў айчыннай вытворчасці на паліцах крам, а таксама асартымент беларускіх вырабаў. Гандаль стараецца іх выконваць, хоць гэтыя нормы - гэта, вядома, антырынак. Нашы прадпрыемствы павінны імкнуцца да канкурэнтаздольнасці сваёй прадукцыі, а не спадзявацца на адміністрацыйныя захады і цяплічныя ўмовы», - адзначыў Жаліба.