Рэгулятар ЕЗ праводзіць экспэртызу расейскай вакцыны «Спадарожнік V»
5- 4.03.2021, 15:42
- 3,028
Расейскую вакцыну ўжо выкарыстоўваюць Вугоршчына і Славаччына.
Еўрапейскае агенцтва лекавых сродкаў (EMA) займаецца экспэртызай расейскай вакцыны «Спадарожнік V» - калі яна будзе паспяховай, прэпарат зацвердзяць для выкарыстання ў Еўразвязе.
Пра гэта паведамляе «Еўрапейская праўда» са спасылкай на заяву агенцтва, апублікаваную 4 сакавіка.
«Камітэт лекавых сродкаў для чалавечага спажывання EMA пачаў рэгулярны агляд «Спадарожніка V» (Gam-COVID-Vac), вакцыны супраць COVID-19, распрацаванай Расейскім нацыянальным цэнтрам эпідэміялогіі ды мікрабіялогіі ім. Гамалеі», - гаворыцца ў паведамленні.
Пастанова камітэта аб пачатку экспэртызы заснаваная на выніках лабараторных даследаванняў і клінічных даследаванняў на дарослых, патлумачылі ў агенцтве.
«Гэтыя даследаванні паказваюць, што «Спадарожнік V» выклікае выпрацоўку антыцелаў і імунных клетак, накіраваных на каранавірус SARS-CoV-2, і можа дапамагчы ахаваць ад COVID-19», - гаворыцца ў заяве.
Экспэртыза прадоўжыцца датуль, пакуль не будзе атрымана дастаткова довадаў для афіцыйнай заяўкі на рэгістрацыю прэпарата.
На гэты момант 42 краіны дазволілі выкарыстанне «Спадарожніка V». Славаччына ў аўторак стала другой краінай ЕЗ пасля Вугоршчыны, якая выдала экстраны дазвол на расейскую вакцыну.