Да перамогі прывядзе толькі рэальны план

Кожны зможа знайсці сваю нішу ў фінальным пратэсце.

На гэты момант назіраецца разварот агульнай тэндэнцыі ў «канчатковым развязанні дыктатарскага пытання». Занадта відавочным становіцца той факт, што ніякія іншыя інструменты, акрамя дзейснага пратэсту, не змогуць абрынуць рэжым у найбліжэйшай перспектыве, піша тэлеграм-канал Resistance.

Міжнародная рэакцыя, санкцыі і іншыя «заклапочанасці» ствараюць толькі дадатковы фон. І калі большая частка пратэстнага грамадства ўсвядоміла, што «гарбатай і карагодамі» рэжым не зрынуць яшчэ восенню, то штаб Ціханоўскай вызначаецца з метадамі дагэтуль. Для дарадчыкаў Ціханоўскай не выстарчыла паўгода на карэкціроўку памылковай стратэгіі. Вянец пераможнай стратэгіі ад штаба Святланы, - гэта перамовы з рэжымам, што на наш погляд з'яўляецца ўтопіяй. Рэжым, як у асобе галоўнага «таварыша», так і ягонага першага кола, не дамоваздольны з розных прычынах, у тым ліку медыцынскага характару. Гэта ўжо ўсвядомілі нават «браты» з Усходу. Калі штаб Ціханоўскай нічога не памяняе ў падыходах, то правал вясновага наступу на рэжым відавочны. Ну і за язык пра перамовы ніхто не цягнуў Святлану Георгіеўну, - травень дык травень, засталося нядоўга.

Як ні дзіўна, у гэтым ёсць свае плюсы.

У грамадстве ўжо даўно саспеў запыт на палітычны суб'ект, які прапануе рэальную стратэгію вызвалення ад дыктатуры. Папярэджваючы крыкі аб хейце Ціханоўскай і расколе, адразу заяўляем, - гэта пойдзе толькі на карысць агульнай справе. Гэта нават не палітычная канкурэнцыя, а пытанне нацыянальнага выжывання. У тым ліку вызваленне з турмаў саміх «міраходаў». Святлана Георгіеўна нарэшце зможа скінуць з сябе камень і прадоўжыць займацца тым, што ў яе лепш за ўсё атрымліваецца, быць сімвалам пераменаў. Лідары не прызначаюцца, яны выяўляюць сябе самі, ну не цягне Ціханоўская на лідарскую адказнасць і больш за тое, яна яе гняце. Бессэнсоўна прадаўжаць патрабаваць ад штаба Ціханоўскай дзеянняў, на якія яны не могуць або не хочуць пайсці.

Гэта неабходна таксама для таго, каб спыніць разборкі на тэму, - хто вінаваты і што рабіць. Чым безумоўна карыстаюцца нашы ворагі. Нам не патрэбныя сваркі, а патрэбна кампіляцыя розных тактык.

Новы суб'ект павінен сфармаваць парадак дзейснага пратэсту і ўзяць на сябе адказнасць за яго рэалізацыю. Фактычна будзе аформлены другі лагер умоўных «радыкалаў», які на гэты момант не прадстаўлены. Кожны зможа знайсці сваю нішу. Гэтыя два крылы павінны вызначыцца з датай пачатку фінальнага бестэрміновага пратэсту. На які выйдуць і «міраходы» і «радыкалы», месца ў страі выстарчыць усім. Як бачым, ніякага расколу не будзе, бо ўсе выступаюць за больш хуткае вяртанне краіны ў нармальны фармат існавання.

Калі будзе фінальны пратэст, - вясной, восенню або зімой, гэта не важна. Калі мы не зможам стварыць суб'ект, штаб, прыняць рэальны план і яго ажыццявіць, то поры года і даты, ніякага значэння не маюць. Значэнне мае толькі наша гатоўнасць.