Украіна зноў унесла Беларусь у «зялёны спіс» па COVID-19

Можна ехаць без ПЛР-тэсту і карантыну.

Міністэрства аховы здароўя Украіны абнавіла «чырвоны» і «зялёны» спісы краін па COVID-19. Беларусь зноў у «зялёным». Гэта значыць, што мы можам ехаць ва Украіну без ПЛР-тэсту і не адседжваць там карантын, піша tut.by.

На сайце Міністэрства аховы здароўя Украіны 5 сакавіка з'явіўся актуалізаваны спіс краін што да распаўсюду COVID-19. Беларусь у «зялёнай» зоне. Паказчык распаўсюджанасці віруса за апошнія 14 дзён на 100 тысяч чалавек у нас 207,2. Ва Украіны гэты паказчык 239,6.

Цяпер мы можам уязджаць ва Украіну без ПЛР-тэсту і не быць 14 дзён на самаізаляцыі. Аднак у нас у кожным выпадку павінен быць страхавы поліс, які кампенсуе выдаткі на лячэнне COVID-19, выдадзены ўкраінскай страхавой кампаніяй або замежнай страхавой кампаніяй, якая мае прадстаўніцтва ва Украіне.

Сёлета мы ўжо былі ў «зялёным» спісе для Украіны, але затым вярнуліся ў «чырвоны». Украінцы і замежнікі, якія вандруюць з краін «чырвонай зоны», павінны мець поліс медыцынскага страхавання, а таксама абавязаныя або пайсці на 14 дзён у ізаляцыю, або цягам дня здаць ПЛР-тэст, або прыехаць на тэрыторыю Украіны ўжо з гатовымі адмоўнымі вынікамі тэставання, зробленага не пазней, чым за 48 гадзін да моманту перасячэння мяжы.