Украіна паскорыць працэс адлучэння ад энэргасістэмы Беларусі і Расеі

Новую дату агучыў в.а. міністра энэргетыкі краіны.

Ад энэргасістэм Беларусі і Расеі Украіна мае намер адлучыцца ў 2022 годзе, а ў 2023-м - далучыцца да еўрапейскай энэргасістэмы ENTSO-E, заявіў в.а. міністра энэргетыкі Украіны Юрый Вітрэнка на сустрэчы з літоўскім калегам Дайнюс Крэйвіс 5 сакавіка ў Кіеве.

«Працэс сінхранізацыі выходзіць на фінішную прамую: у 2022 годзе АЭС (аб'яднаная энэргетычная сістэма. - рэд.) Украіны аддзеліцца ад энэргасістэм Расеі і Беларусі і пяройдзе ў ізаляваны рэжым працы. Пасля гэтага, у 2023 годзе, адбудзецца поўная сінхранізацыя з ENTSO-E», - сказаў Вітрэнка, якога цытуе прэс-служба яго ведамства.

На думку в.а. міністра, дзякуючы гэтаму істотна падвысіцца «стабільнасць і дынамічная ўстойлівасць украінскай і еўрапейскай энэргасістэм», будзе забяспечана дэманапалізацыя энэргетычнага рынку ва Украіне, уведзеныя «дзейсныя празрыстыя еўрапейскія правілы і працэдуры».

Як заявіў Вітрэнка, для паскарэння сінхранізацыі з еўрапейскай сістэмай неабходная мадэрнізацыя генерыруючага абсталявання і сетак.

Стратэгічная пазіцыя ведамства, адзначыў чыноўнік, - не падтрымліваць імпарт электраэнэргіі з Расеі і Беларусі, таму Мінэнэрга «напрацоўвае механізмы праходжання асення-зімовага перыяду без такога імпарту».

«У кантэксце імпарту электраэнэргіі з Беларусі» бакі «закранулі пытанне Астравецкай АЭС», адзначаецца ў паведамленні паводле вынікаў перамоў.

«Гэта геапалітычны праект: гэта агульная пагроза для Літвы і Украіны, таму мы павінны праявіць салідарнасць, спыніўшы яе далейшае развіццё», - сказаў Дайнюс Крэйвіс.

З яго слоў, АЭС ужо сутыкалася з аварыямі і перабоямі ў працы, што выклікае сур'ёзную заклапочанасць і сведчыць пра неабароненасць станцыі. Літоўскі міністр заявіў пра важнасць «не гандляваць небяспечнай электраэнэргіяй з Беларусі».

Вітрэнка і Крэйвіс дамовіліся стварыць сумесную рабочую групу, у склад якой маглі б увайсці прадстаўнікі суб'ектаў энэргетычнага сектара і рэгулятараў, «для абмену інфармацыяй аб стане бяспекі на Беларускай АЭС, імпарце электраэнэргіі з Расеі, маніторынгу і аналізу энергапаставак». Група будзе таксама абменьвацца досведам бягучых праектаў сінхранізацыі энэргасістэм. «Наша цеснае супрацоўніцтва - важны інструмент дасягнення энэргетычнай незалежнасці - мы павінны забяспечыць гэта на вышэйшым палітычным узроўні», - падкрэсліў Крэйвіс.

Тэма адлучэння ўкраінскай энэргасістэмы ад беларускай і расейскай, а таксама бяспекі АЭС пад Астраўцом падымалася на перамовах кіраўнікоў знешнепалітычных ведамстваў Украіны і Літвы 23 лютага сёлета ў Кіеве.

«З савецкіх часоў украінская электрычная сетка далучаная і з'яўляецца часткай адзінай сеткі, якая ўключае таксама Беларусь і Расею. Але мы хочам адрэзацца ад гэтай сеткі і зрабіць украінскую электрасетку інтэграванай часткай еўрапейскай сеткі. Мы плануем гэта зрабіць да канца 2023 года. Пасля гэтага якія-небудзь ператокі электраэнэргіі з Беларусі стануць фізічна немагчымымі», - заявіў міністр замежных спраў Украіны Дзмітрый Кулеба.

«Мы ні ў якім разе не хочам наносіць шкоду энэргетычнай або экалагічнай бяспецы Літвы. Але, каб дасягнуць 100-адсоткавага выніку ў гэтай сферы, нам трэба адрэзацца ад беларускай савецкай электрасеткі», - дадаў кіраўнік літоўскай дыпламатыі Габрыэлюс Ландсбергіс.

Цяпер Літва, Латвія і Эстонія створаць сумеснае энэргетычнае кола з Беларуссю і Расеяй (БРЭЛЛ), ад якога плануюць адлучыцца не пазней за 2025 год.

Раней міністр замежных спраў Украіны Дзмітрый Кулеба заяўляў, што адмова ад беларускай і расейскай электраэнэргіі адбудзецца да канца 2023 года.