Мінфінансаў РФ выявіла мільярдныя страты ў Фондзе нацыянальнага дабрабыту пасля інвестыцый у юані

Не паспеў расейскі ўрад набыць кітайскую валюту, як яе курс пакаціўся па нахільнай уніз.

Інвеставанне валютных рэзерваў урада, назапашаных у Фондзе нацыянальнага дабрабыту, абярнулася стратамі, паведаміла расейскае Мінфінансаў у справаздачы аб выніках размяшчэння сродкаў ФНБ, піша finanz.ru.

За перыяд з 15 снежня 2020 года да 28 лютага 2021-га ліквідная частка ФНБ - гэта значыць, яшчэ не выдаткаваныя грошы, размешчаныя на валютных рахунках у ЦБ, - прынесла адмоўную даходнасць у суме «мінус 50 млн даляраў».

У пераліку на рублі страта склала 3,7 мільярда рублёў. Як вынікае са звестак Мінфіна за папярэдні месяц, амаль уся сума (47 млн даляраў, ці 3,5 млрд рублёў) была страчаная ў лютым - месяцы, калі Мінфінансаў наважыла змяніць структуру ФНБ, дадаўшы ў кошык кітайскія юані (15%) і японскую іену (5%).

Скараціўшы долю даляра і еўра з 45% да 35%, міністэрства набыло 600,3 млрд ен і 110,5 млрд юаняў, аддаўшы на гэтыя аперацыі пятую частку фонду. Але як толькі стаўка на кітайскую і японскую валюты была зробленая, іх курсы здрадліва пакаціліся ўніз.

Юань пасля 8 месяцаў бесперапыннага росту ў лютым патаннеў на 0,6%, а з пачатку сакавіка страціў яшчэ 0,4% да даляра. Ена абясцэнілася на 1,9% за люты і яшчэ столькі ж за першы тыдзень сакавіка, апынуўшыся на мінімуме за апошнія паўгода.

Дату і курс куплі новых валют Мінфін не паведамляе. Адпаведна, падлічыць дакладную суму курсавых страт немагчыма. Страта, аднак, выявілася дастатковай для таго, каб перасягнуць даходы ад каштоўных папер і банкаўскіх дэпазітаў, дзе валюту размяшчае ЦБ.

Куплю юаняў Мінфінансаў ажыццявіла, калі кітайская валюта каштавала рэкордна дорага за апошнія паўтара года, і цяпер рызыкуе паўтарыць досвед Эльвіры Набіулінай, напаўняючы юанямі ЗВР на лакальных максімумах рынку. З 70 млрд даляраў, укладзеных цэнтрабанкам у кітайскую валюту, 44 млрд былі праінвеставаныя ў другім квартале 2018 года - напярэдадні значнага падзення, якое апусціла курс да мінімуму за 12 гадоў.

ЦБ РФ удалося адыграць шматмільярдныя даляравыя страты пасля таго, як юань рэзка ўмацаваўся ў другой палове мінулага года - з 7,2 да 6,4 юаня за даляр. Але цяпер патэнцыял яго росту практычна вычарпаўся, мяркуе эканаміст банка Julius Baer Сафі Алтэрмат.

На юань цісне агульнае ўмацаванне даляра, які пачаў расці разам з даходнасцю амерыканскай дзяржпазыкі.

Акрамя таго, кітайскія ўлады, хутчэй за ўсё, будуць перашкаджаць моцнаму прытоку капіталу ў краіну і падвышэнню курсу юаня, кажа Алтэрмат.