Літоўскія мытнікі знайшлі ў беларускім цяжкавіку кантрабандныя цыгарэты на мільён еўраў
20- 7.03.2021, 14:18
- 7,858
Груз, кіроўца і аўтамабіль затрыманыя.
Літоўскія мытнікі ў пункце пропуску Райгардас (Прывалка) выявілі ў беларускай фуры 640 каробак кантрабандных цыгарэт на суму, большую за мільён еўраў. Тытунёвыя вырабы былі схаваныя сярод дошак, паведамляе Delfi.lt.
Кантрабанду літоўскія памежнікі знайшлі ў пачатку гэтага тыдня. У фуры, якой кіраваў кіроўца-беларус, паводле дакументаў знаходзілася 22 тоны дошак.
На прапускны пункт Прывалка - Райгардас аўтамабіль прыехаў уначы. Вялікагруз выклікаў падазрэнні ў літоўскіх мытнікаў: драўніну часта выкарыстоўваюць для маскоўкі кантрабанды. Таксама падазроным падаўся і маршрут грузу - дошкі везлі транзітам праз Літву ў Эстонію.
Пастанавілі праверыць груз з дапамогай рэнтгену, але ў Райгардас такой магчымасці няма, таму фуру з аховай адправілі ў Медзінінкай.
Праверка пацвердзіла падазрэнні: высветлілася, што дошкі - гэта толькі прыкрыццё. Унутры паўпрычэпа былі схованкі, дзе знаходзілася 320 тысяч пачкаў беларускіх цыгарэт марак Fest, NZ і Minsk. Агульная сума кантрабанды - 1,14 мільёна еўраў.
Паводле гэтага факта распачатае расследаванне. Груз і фура затрыманыя, кіроўцу суд дазволіў на месяц узяць пад арышт.