«Ва ўсіх праблемах у краіне вінаватая тая ж самая вертыкаль на чале з тым жа дзедам»

І ніхто іншы.

8 сакавіка выканаўчы камітэт МАК збярэцца на сваё пасяджэнне. На парадку дня значыцца і беларускае пытанне. Вось і паглядзім, наколькі ўдалася аперацыя «выбары без выбару», якую пракруцілі ў НАК Беларусі, піша Telegram-канал «Нік і Майк».

МАК намагае цалкам новых асоб. Асобы, як мы адзначалі, памяняліся, але не ўсе. А прозвішчы засталіся амаль тыя ж. Самае галоўнае - нічога не змянілася з парушэннем правоў спартоўцаў. Думаецца, як раз пра гэта і быў ліст Фонду спартовай салідарнасці Беларусі, які быў адпраўлены ў МАК пару дзён таму. Балазе свежыя прыклады прыспелі - у нацыянальную каманду Беларусі ў гандболе не выкліканыя лідэркі Ёжыкава і Несцярук. Уся рэч у тым, што яны з'яўляюцца падпісанткамі ліста за сумленныя выбары.

А на вуліцах Радужнай і Кірава тым часам рыхтуюцца да горшага сцэнару. На выпадак, калі чырвона-зялёнага сцяга і савецкага гімну ў Токіё не будзе, ужо запісаныя звароты «правільных» спартоўцаў. Справядлівы гнеў набіты ў гарматы Гёбэльс-ТВ. Бандзе Баха дадуць выяўны і прынцыповы адказ!

Аднак, праўда, у іншым: вінаватыя ва ўвядзенні санкцый МАК - спартовая вертыкаль на чале з дзедам. І ніхто іншы. Роўна як і ва ўсіх праблемах у краіне вінаватая тая ж самая вертыкаль на чале з тым жа дзедам.

Калі што, Беларусь выступіць без сцяга другі раз у гісторыі. Першы быў у 1992 годзе ў Альбэрвілі і Барсэлоне, тады выступіла так званая каманда СНД, у якую ўваходзілі і беларускія спартоўцы (Шчэрба ўзяў шэсць медалёў). Тады выступілі пад алімпійскім сцягам.

Праўда, невядома, што дзеду можа ўзбегчы на думку. Можа так здарыцца, што на Гульні не паедзе наогул ніхто. Такі вось адказ у стылі: на злосць маме вушы адмарожу.