Тэрмін утрымання Марыі Калеснікавай пад вартай скончыўся

Але яна не на свабодзе.

8 сакавіка скончыўся тэрмін утрымання пад вартай Марыі Калеснікавай. Але нягледзячы на заканчэнне тэрмінаў, паведамленняў, што яе вызвалілі з CІЗА, няма, піша tut.by.

Апошні раз следства прадоўжыла меру зняволення Марыі Калеснікавай у выглядзе ўтрымання пад вартай 6 студзеня. Следчыя прадоўжылі тэрмін на два месяцы да 8 сакавіка. Больш аб прадаўжэнні тэрмінаў утрымання не паведамляецца. Але няма і інфармацыі аб вызваленні Марыі.

Чакаецца, што толькі 9 сакавіка адвакат сустрэнецца з Марыяй Калеснікавай у СІЗА.

Марыю Калеснікаву арыштавалі ў межах крымінальнай справы аб публічных закліках да дзеянняў, накіраваных на прычыненне шкоды нацыянальнай бяспецы (ч.3 арт.361 КК.) Крымінальную справу распачала Генпракуратура.

Марыя Калеснікава была адным з лідараў прэзідэнцкай кампаніі Віктара Бабарыкі і Аб'яднанага штаба. 7 верасня яе схапілі невядомыя ў цэнтры Менску, некалькі дзён родныя і сябры нічога не ведалі пра яе лёс. Высветлілася, што сілавікі планавалі прымусова вывезці яе за мяжу. Аднак аперацыя спецслужбаў правалілася: у нейтральнай зоне на мяжы Марыя парвала ўласны пашпарт, выскачыла з аўтамабіля і вярнулася на беларускую тэрыторыю.

Марыю прызналі палітвязнем і вязнем сумлення. Еўрапарламент удастоіў яе прэміі імя Сахарава за ўнёсак у барацьбу за правы чалавека.