Дзярждэпартамент пашырыў магчымасці для ўезду ў ЗША
4- 9.03.2021, 9:40
- 3,430
Скасаваныя забароны жыхарам 13 краін.
Папярэдняя адміністрацыя Белага дома ўвяла забарону на ўезд у Злучаныя Штаты для грамадзян краін з пераважна мусульманскім насельніцтвам.
Большасць просьбітаў амерыканскіх віз, якім было адмоўлена ва ўездзе ў ЗША праз забарону, уведзеную былым прэзідэнтам Дональдам Трампам, могуць папрасіць перагледзець прынятую пастанову або падаць новыя заяўкі, паведаміў Дзяржаўны дэпартамент.
Прэзідэнт Байдэн скасаваў забарону, уведзеную яго папярэднікам Дональдам Трампам, у першы дзень яго прэзідэнцтва - 20 студзеня 2021 году - назваўшы гэта ў сваёй заяве «плямай на нашым нацыянальным сумленні», паведамляе «Голас Амерыкі».
Прадстаўнік Дзярждэпартамента Нэд Прайс адзначыў, што заяўнікі, якім было адмоўлена ў выдачы візы да 20 студзеня 2020 года, павінны падаць новыя заяўкі і аплаціць новы рэгістрацыйны збор. Са слоў Прайса, тыя, каму было адмоўлена 20 студзеня 2020 года або пазней, могуць запатрабаваць перагляду пастановы без паўторнай падачы сваіх заявак і без выплаты рэгістрацыйнага збору.
Са звестак Дзярждэпартамента, са снежня 2017 году блізу 40 тысяч чалавек былі пазбаўленыя права ўезду ў Злучаныя Штаты ў адпаведнасці з выканаўчым указам.
За папярэдняй адміністрацыяй некаторыя краіны былі дададзеныя, а іншыя выключаныя са спісу. У канцы прэзідэнцтва Дональда Трампа ў яго ўваходзілі М'янма, Эрытрэя, Іран, Кыргызстан, Лібія, Нігерыя, Паўночная Карэя, Самалі, Судан, Сірыя, Танзанія, Венесуэла і Емен.