Гары Каспараў патлумачыў, што трэба зрабіць Захаду, каб у «крыкуноў» з РФ стала менш агрэсіўнасці

Расейскі апазіцыянер прапанаваў дзейсны спосаб.

На агрэсіўныя заявы прадстаўнікоў расейскіх уладаў Захаду трэба адказаць высылкай назад у РФ іх блізкіх. Такое меркаванне выказаў 9 красавіка ў эфіры радыёстанцыі "Эхо Москвы" расейскі апазіцыянер Гары Каспараў.

Гаворка пра гэта зайшла пры абмеркаванні магчымага адкрытага ўварвання расейскіх войскаў ва Украіну і згадванні словаў спікера кіраўніка Крамля Дзмітрыя Пяскова, што "калі будзе гэты канфлікт, то ўбаку не застанецца ні адна краіна".

"Падыходзім да таго, што, з аднаго боку, ёсць заява, нахабства такое. Ну, шпана з падваротні, якая адчувае, што інтэлігент у акулярах не адкажа. [...] Напрыклад, нармальнай рэакцыяй на пяскоўскую заяву была б высылка ягонай дачкі з Францыі. Проста выслаць яе назад у Расею. На самай справе нямала ёсць адрасоў сем'яў на Захадзе вось гэтых крыкуноў, якія хутка б іх ацверазілі", – сказаў Каспараў.

Паводле ягоных словаў, трэба "пачаць адбіраць проста ў іх магчымасць прыязджаць у гэты цывілізаваны свет, а што вельмі важна – у чальцоў іхніх сем'яў".

"Думаю, што агрэсіўнасць адразу паменшыцца. Вось не сумняваюся ў гэтым, што неяк пачнуць задумвацца пра тое, што гэта не ўвогуле гіпатэтычныя краіны, нейкая мапа, а гэта мы канкрэтныя з нашымі канкрэтнымі інтарэсамі. Магчымасцяў тут процьма. [...] Мы ведаем, што людзі вакол Пуціна могуць сябе паводзіць па-рознаму, як толькі іхнія інтарэсы будуць закранутыя", – мяркуе апазіцыянер.

Ён адзначыў, што пакуль падобнага ніхто не рабіў, не варта казаць, што гэта апынецца неэфектыўным.

"Пакуль яны ўсё разважаюць і разважаюць, пагражаюць, размахваюць кулакамі, пырскаюць слінай з нагоды гіпатэтычных падзей, якія да іх ніяк не адносяцца. А Пуціну ўсё роўна ўжо. Ён ужо жыве ў іншым вымярэнні. Але яны ўсе, увогуле, жывуць на Зямлі. Яны выдатна разумеюць, што калі за імі прыйдуць, хай нават у такой апасродкаванай форме, як для пачатку пачнуць высылаць чальцоў іхніх сем'яў з камфортных умоваў заходніх краінаў, дзе яны жывуць, і заадно могуць зайсці па банкаўскія рахункі", – патлумачыў Каспараў.

Ён прывёў прыклад з расейскім журналістам Уладзімірам Познерам, супраць прыезду якога выйшлі пратэставаць у Грузіі.

"Як заверашчаў Познер, калі яго папрасілі з Грузіі? Проста заверашчаў так, што далей няма куды проста. У Грузію хочацца ехаць, не падабаецца. А калі закрыць дарогу не толькі ў Грузію, а ў многія іншыя краіны? Гэта кошт, які трэба плаціць. Пакуль за 20 гадоў кіравання Пуціна ніякага рэальнага кошту пуцінскай асяроддзе, тыя, хто з'яўляюцца выканаўцамі вось гэтай агрэсіўнай палітыкі, яны яшчэ не заплацілі. Таму не трэба казаць, што гэта не працуе, акурат таму, што ніхто гэтага яшчэ не спрабаваў. Я прапаную. Давайце паспрабуем для пачатку і паглядзім на іх рэакцыю", – прапанаваў Каспараў.