Віталь Гуркоў - пра перамогу рэвалюцыі: Трэба пратрымацца да 12-га чэмпіёнскага раўнда

Палову раўндаў мы ўжо прайшлі.

У жывым эфіры «Радыё Свабода» беларускі кікбаксэр, шматразовы чэмпіён сьвету і вакаліст панк-гурту BRUTTO Віталь Гуркоў адказаў на пытаньні пра беларускую аўдыторыю.

Якую спартовую мэтафару вы б прапанавалі для беларускай рэвалюцыі?

— Трэба пратрымацца да 12-га чэмпіёнскага раўнду. Дакладна, палову раўндаў мы ўжо прайшлі. Якімі будуць наступныя раўнды, яшчэ ніхто ня ведае. Трэба быць мацнейшымі, больш асьцярожнымі і ўважлівымі, не губляць канцэнтрацыі. І ўсё будзе добра. Адказ на гэтае пытаньне залежыць ад таго, што вы лічыце перамогай. Я лічу перамогай, калі ў нас будзе незалежная, вольная Беларусь са сваёй мовай, культурай, гісторыяй.

Што гаварылі пра Беларусь на сустрэчы з прэзыдэнтам Уладзімірам Зяленскім?

— Гэта была нефармальная размова з нагоды таго, што Сяргею Ўладзіміравічу Міхалку ўсё ж далі ганаровае званьне заслужанага артыста Ўкраіны. У нас пыталіся, што, на нашую думку, цяпер адбываецца ў Беларусі. Мы пачулі пра законы для айцішнікаў, пра павелічэньне тэрмінаў знаходжаньня ва Ўкраіне для беларусаў. Нешта робіцца. Мы самі бачым, як шмат беларусаў зьехала ва Ўкраіну. Дзе б ты ні быў — Львоў, Адэса ці Кіеў, беларусаў вельмі шмат. У мяне шмат беларусаў трэніруецца. Нехта зьехаў за 2–3 месяцы да падзеяў, нехта пасьля, нехта год таму. Шмат беларусаў ва Ўкраіне з рознымі гісторыямі.

Калі гэта скончыцца?

— Беларусы — пазытыўныя, таму хочуць адказу на пытаньне, калі гэта ўсё скончыцца. Пасьля Новага году, вясной, 25 сакавіка, 9 траўня... Давайце ня ставіць ніякіх датаў, не падманваць і не падманвацца. Проста рабі што павінен, і будзе што будзе.

Чаму важна адмовіцца ад алькаголю і тытуню і далучыцца да Зборнай здаровага ладу жыцьця?

— Беларусам патрэбны зарад бадзёрасьці і рашучасьці, бо дэпрэсіўная зіма была, дэпрэсіўныя навіны. Спартоўцы, як сацыяльна адказныя людзі, падтрымалі ініцыятыву Беларускага фонду спартовай салідарнасьці. Трэба захаваць здароўе, узьняць настрой і пазбавіцца нэгатыўнага асяродзьдзя. Заняткі спортам падтрымліваюць агульны настрой і фізычную форму, і, да таго ж, можна далучыцца за кляснай кампаніі свабодных спартоўцаў Беларусі.

Ці вядуць здаровы лад жыцьця Лукашэнка і ягонае атачэньне?

— Усе мы бачылі людзей на «Ўсебеларускім народным сходзе». Дастаткова паглядзець на іх твары, фігуры, і адразу можна меркаваць, хто займаецца спортам, а хто не.

Чаму ня варта купляць цыгарэты і алькаголь?

— Я курыў толькі ў трэцяй клясе, пакуль дзягі не атрымаў ад бацькоў. Тытунёвы і алькагольны бізнэс губіць жыцьці, семʼі распадаюцца, гэта зло. У сваю школьную пару я памятаю, што шапікі з разьліўным півам і цыгарэтамі ўраздроб былі каля маёй школы. Потым іх прыбралі, а цяпер ізноў па ўсім горадзе «Табакеркі» зьявіліся — каля шпіталяў, каля школаў, на ўсіх прыпынках. Адмова ад алькаголю і цыгарэтаў адыграе пазытыўную ролю ў жыцьці, няважна, у якой краіне гэта выраблена і дзе прадаецца.