Навукоўцы распавялі, як праверыць «чалавечы ўзрост» вашага ката і сабакі

Карыстацца сістэмай «год за сем» зусім няправільна.

Людзі любяць надзяляць сваіх гадаванцаў чалавечымі якасцямі. Мы нават спрабуем «пералічваць» узрост сабак на свой уласны. Напрыклад, многія думаюць, што год сабачага жыцця можна лічыць за сем чалавечых гадоў, піша «Популярная механика».

Упэўненыя, вы ўсё яшчэ карыстаецеся сістэмай падліку «год за сем», але гэта зусім няправільна!

Вызначэнне рэальнага ўзросту гадаванца вельмі важнае, бо гэта дапамагае ветэрынарам складаць рэкамендацыі для лячэння ў выпадку хваробы. Аднак узрост сабакі ці коткі не мае нічога агульнага з чалавечым. Людзі прывыклі памнажаць гады гадаванца на сем, бо вынік паказвае сярэднюю працягласць жыцця чалавека, але гэта толькі міф.

Па-першае, сабакі і кошкі старэюць па-рознаму, гэта залежыць ад пароды і памеру. Больш буйныя жывёлы, як правіла, маюць карацейшую працягласць жыцця. Але пры гэтым кожная парода ўсё роўна праходзіць аднолькавыя стадыі, напрыклад, у сабак ветэрынары вылучаюць усяго шэсць этапаў развіцця: шчанюк, юнацтва, паўналецце, сталасць, старасць і глыбокая старасць. Спецыялісты кажуць, што дзяліць развіццё сабакі на этапы лагічней, чым прысвойваць лічбы ўзросту. Гэта дакладна нават для чалавека.

Напрыклад, за першыя пяць месяцаў жыцця сабака ўжо падыдзе да перыяду палавога паспявання. А да года ён ужо можа як стаць паўналетнім, так як і сталым (у залежнасці ад памеру і пароды)!

Аднак калі вы ўсё ж такі хочаце пералічыць гады свайго сабакі на «чалавечыя», то, магчыма, вам варта скарыстацца сістэмай падліку, якую прапанавалі навукоўцы ў 2020 годзе. Прааналізаваўшы ДНК больш за 100 лабрадораў-рэтрывераў, аўтары даследавання прыйшлі да высновы, што адзін год жыцця сабакі роўны... 30 чалавечым! Аднак з часам хуткасць старэння ў сабак, у параўнанні з людзьмі, запавольваецца. Таму да 14 гадоў ім будзе прыблізна 70 гадоў.

Што тычыцца котак, то ветэрынары дзеляць іх узрост аналагічным метадам. Каты перажываюць шэсць этапаў: кацяня, юнацтва, сталасць, «сярэдні ўзрост», старасць і глыбокая старасць. Паколькі ў катоў не назіраецца сур'ёзнай розніцы ў памерах, усе пароды праходзяць розныя этапы прыкладна з аднолькавай хуткасцю.