Экспарт расейскай нафты абрынуўся ў першым квартале

Краіна губляе свае звыклыя рынкі.

Значнае падвышэнне коштаў нафты і змякчэнне ўмоў угоды ОРЕС+, у рамках якой Расея самотна змагла павялічыць здабычу нафты ў пачатку года, не змагло наблізіць расейскую эканоміку да дакавіднага ўзроўню нафтадаляравых даходаў, піша finanz.ru.

У студзені-сакавіку 2021 года продаж вуглевадародаў за мяжу прынёс у краіну 45 млрд даляраў, даў справаздачу ЦБ РФ у звестках аб аплатным балансе за першы квартал.

Хоць сярэдняя цана Urals амаль на 24% перавысіла леташнюю (59,8 даляра за барэль супраць 48,2 даляра), аб'ём прыбытку, атрыманага нафтагазавымі кампаніямі, на 12% ніжэйшы, чым у першыя тры месяцы 2020 года.

На продажы нафты Расея зарабіла 20,2 млрд даляраў - на 21% менш, чым год таму. Даходы ад экспарту нафтапрадуктаў упалі на 17%, да 13,6 млрд даляраў.

Рэкордны экспарт газу, які прынёс 10,4 млрд даляраў за квартал (+ 44% год да года) не змог выправіць агульную сітуацыю. У параўнанні з дакавідным 2019 годам прыток нафта-і газадаляраў у эканоміку застаўся ніжэйшым амаль на траціну.

Адставанне звязанае з прыкметным скарачэннем фізічнага аб'ёму экспарту нафты, адзначае кіраўніца аддзела макраэканамічнага аналізу «Фінам» Вольга Беленькая.

Паводле звестак ЦДУ ТЭК, пастаўкі «чорнага золата» за мяжу засталіся на 22% ніжэйшымі, чым у 2020 годзе, нягледзячы на тое, што здабыча расце - на 65 тысяч барэляў на дзень у лютым, на 114 тысяч - у сакавіку (у рамках пагаднення ОРЕС+).

У лютым у расейскіх кампаній пачаліся праблемы з продажамі партый у Еўропу, пісалі аналітыкі S&P Global Platts: заяўленыя танкерныя пастаўкі не маглі знайсці попыту.

У сакавіку цяжкасці ўзніклі на кітайскім накірунку. «Попыт на расейскую Urals, CPC Blend, а таксама гатункі з Заходняй Афрыкі проста выпарыўся», - распавядаў Reuters нафтатрэйдар. які працуе ў Азіі.

На рынку з'явіліся чуткі, што дзяржаўныя сховішчы ў КНР запоўненыя цалкам, а НПЗ пачалі перапрацоўваць нафту, набытую дэмпінгавымі коштамі, мінулай вясной.

Нафтагазавыя даходы эканомікі апынуліся на ўзроўні трэцяга квартала 2017 года, але тады нафта каштавала на 8 даляраў даражэй; пры гэтым аб'ёмы экспарту на 1 даляр за барэль упалі практычна да гістарычнага мінімуму, паказвае галоўны эканаміст ING што да Расеі і СНД Дзмітрый Далгін.

Адбілася дырэктыўнае абмежаванне экспарту, мяркуе ён: у лютым урад даручыў нафтавікам адпраўляць больш нафты на ўнутраную перапрацоўку пасля таго, як біржавыя кошты бензіну накіраваліся да 3-гадовых максімумаў, а на Далёкім Усходзе і ў Сібіры паўстаў дэфіцыт паліва.

Нізкі прыток валюты ад экспарту нафты стаў адной з прычын слабасці рубля ў пачатку года разам з санкцыйнымі рызыкамі і глабальным умацаваннем даляра, адзначае Беленькая.

Пры тым што агульныя экспартныя даходы аселі на 2% год да года, імпарт узляцеў на 12%. У выніку сальда гандлёвага балансу сціснулася на чвэрць, да 24,4 млрд даляраў, а аплатнага - на 27%.

Чысты прыток валюты ў эканоміку (прафіцыт рахунку існых аперацый) склаў 16,8 млрд даляраў. Для першага квартала, традыцыйнага самага шчаснага з пункту гледжання валютных плыняў, гэта мінімальнае значэнне з 2016 года, кажа Беленькая.

Аднаўленне расейскага нафтавага экспарту да звычайных за 5 млн барэляў на дзень будзе праходзіць паступова, па меры таго, як ОРЕС+ здымае абмежаванні на здабычу, паказвае Далгін.

У выніку ўгоды, укладзенай летась пасля «кровапралітнай» і не пераможнай цэнавай вайны з Савудаўскай Арабіяй, Расея скараціла вытворчасць нафты да мінімуму за 10 гадоў - 512,7 млн тонаў.

Шлях да ранейшых аб'ёмаў здабычы і экспарту будзе цярністы, казаў раней Дзмітрый Перавалаў, былы віцэ-прэзідэнт «Слаўнафты»: «Мы страцілі нашы рынкі, і цяпер будзе няпроста іх вярнуць».