Прэзідэнтка Славаччыны патрабуе апублікаваць сакрэтны кантракт аб куплі «Спадарожніка V»

У краіне прадаўжаецца палітычны крызіс, выкліканы скандалам вакол расейскай вакцыны.

Прэзідэнтка Славаччыны Зузана Чапутава выступіла за як мага больш хуткую публікацыю кантракту на закуп яе краінай расейскай вакцыны «Спадарожнік V».

Пра гэта паведамляе «Еўрапейская праўда» са спасылкай на Aktuality.

Чапутава таксама адзначыла, што прычынай расейскага патрабавання вяртання вакцын з’яўляецца іншая праблема, чым указаная расейскім фондам наўпроставых інвестыцый.

«Пасля стараннага вывучэння кантракту я магу канстатаваць два факты. На маю думку, гэта кантракт, які павінен быў быць належным чынам апублікаваны ў адпаведным парадку», - сказала кіраўніца дзяржавы.

«У дадатак да кантракту, я таксама папрасіла ліст ад 6 красавіка, які расейскі бок накіраваў славацкаму боку з просьбай вярнуць вакцыну. Грамадскасці было паведамлена, што прычынай, паводле якой расейскі бок зрабіў такі запыт, было тое, што Дзяржаўны інстытут кантролю за лекамі правёў тэставанне вакцыны «Спадарожнік V» у лабараторыі, якая не прайшла неабходнай сертыфікацыі. На падставе абодвух вывучаных дакументаў я сцвярджаю, што гэта заява не адпавядае рэчаіснасці. Прычынай просьбы аб вяртанні быў іншы факт», - дадала Чапутава.

Пры гэтым сапраўднай прычыны патрабавання вярнуць вакцыну яна раскрываць не стала.

Чапутава выказала надзею, што пасля публікацыі кантракту «грамадскасць больш не будзе занепакоеная распаўсюджваннем непраўдзівай інфармацыі аб тым, кім быў парушаны кантракт на пастаўку вакцыны».

«Што тычыцца публікацыі кантракту, мы цяпер аналізуем прадмет. Праз цяперашнія ўмовы кантракту, мы не можам цяпер каментаваць яго часткі», - заявілі ў сваю чаргу ў міністэрстве аховы здароўя Славаччыны.

Як паведамлялася, Расейскі фонд наўпроставых інвестыцый папрасіў Славаччыну вярнуць перададзеную ёй партыю вакцыны «Спадарожнік V» за «парушэнне кантракту».

Як вядома, Славаччына сутыкнулася з палітычным крызісам пасля таго, як дзве невялікія партыі заявілі аб магчымым выхадзе з кіроўнай кааліцыі праз закуп урадам 2 мільёнаў доз расейскай вакцыны ад каранавіруса «Спадарожнік V».

Прэм'ер Ігар Матавіч сышоў у адстаўку, ягонае месца заняў Эдуард Гегер.