У Менску пачынаецца працэс над рэперам Цімам Беларускіх

Яму пагражае да пяці гадоў турмы.

У 2018 годзе гіты «Мокрыя кросы» і «Незабудка» гучалі ледзь не з кожнага праса. Іх выканаўцу, Ціму Беларускіх, запрашаў на сваё шоў Іван Ургант, інтэрв'ю з ім рабіла блогерка-мільённік Таццяна Мінгалімава, піша tut.by.

У студзені 2021-га з'явіліся іншыя навіны: у Следчым камітэце распавялі, што музыку з наркотыкамі затрымалі ў адным з гульнявых клубаў. У пятніцу, 16 красавіка, увага тысяч яго фанатаў прыкаваная да суду Маскоўскага раёну Менску. Ціму Беларускіх судзяць паводле ч.1 арт. 328 КК РБ. Пакаранне паводле гэтага артыкула - абмежаванне волі на тэрмін да пяці гадоў або пазбаўленне волі на тэрмін ад двух да пяці гадоў.

Ціма Беларускіх, ён жа Цімафей Марозаў, да суда знаходзіўся пад закладам. Працэс паводле ягонай справы павінен пачацца а 10.30. Да будынку суду артыст прыехаў а 10.00. З ім яго абаронца, вядомы адвакат Марыя Калесава-Гудзіліна. Ад каментароў прэсе ён адмовіўся. Ягоная адвакатка сказала, што «у нас цудоўны настрой».

Па дарозе ў суд ён таксама запісаў відэа для сваіх прыхільнікаў. У ім ён падзякаваў усім за падтрымку.

- Усё будзе добра, буду трымаць вас у курсе, вечарам скіну допіс, дзе паспрабую ўсё вам расказаць, растлумачыць са сваёй званіцы.

А 10.06 прыехала група падтрымкі артыста. Размаўляць з журналістамі яны таксама адмовіліся.

Людзі, якія прыехалі ў суд, не адразу разумеюць, што адбываецца.

- Напэўна, судзяць нейкую знакамітасць, - заўважаючы натоўп журналістаў, разгублена кажа жанчына, на выхадзе з суда.

Усе, хто прыйшоў на працэс над Цімам Беларускіх, заходзяць у будынак па адным. На ўваходзе ў іх, як і належыць у судзе, правяраюць дакументы, але, паколькі людзей шмат, каля ўваходу з'явілася чарга. З журналістаў прапусцілі толькі дзяржаўныя СМІ і «Комсомольскую правду». Астатнія, як і невялікая частка групы падтрымкі, стаяць на дварэ.

- Усе, хто прыйшоў на суд Цімы Беларускіх, адыдзіце ўбок, - звяртаецца да натоўпу міліцыянт, які дзяжурыць ля ўваходу.

А 10.23 супрацоўніца суда выйшла да людзей: «Усе месцы ў зале паводле справы Марозава занятыя». Гэта значыць, больш нікога не прапусцяць, у тым ліку і журналістаў.

Справа Цімы Беларускіх

Нагадаем, 22-гадовага Ціму Беларускіх затрымалі ноччу 6 студзеня ў гульнявым клубе ў Менску. Пры асабовым вобшуку ў яго знайшлі гашыш масай 0,4 г. Акрамя гэтага, падчас асабістага вобшуку пры ім было таксама канфіскавана парашкападобнае рэчыва белага колеру масай 0,03 грама, якое згодна з высноай экспэртызы з'яўляецца амфетамінам.

У дачыненні да менчука распачалі крымінальную справу паводле ч. 1 арт. 328 КК. Яго адпусцілі пад заклад.

Крымінальную справа ў дачыненні да спевака і яго 25-гадовага знаёмага пракуратура накіравала ў суд 25 сакавіка. Згодна з матэрыяламі справы, хлопцы ў снежні і студзені купілі больш 1,96 грама гашышу праз інтэрнэт. Частка ўжылі ў гульнявым клубе, астатняе выявілі міліцыянты.

Сваю віну ў зробленым абвінавачаныя прызналі ў поўным аб'ёме.

Паводле арт. 328 ч. 1 за незаконнае без мэты збыту захоўванне наркатычных сродкаў яму пагражае абмежаванне волі на тэрмін да пяці гадоў або пазбаўленне волі на тэрмін ад двух да пяці гадоў.