Археолагі знайшлі сляды юных неандэртальцаў

Знойдзеныя адклады з адбіткамі належаць да перыяду плейстацэну, прыкладна 106 тысяч гадоў таму.

У Гішпаніі археолагі знайшлі скамянелыя сляды вялікай сям'і неандэртальцаў, узростам 100 тысяч гадоў, чые дзеці гулялі ў пяску ля вады. «Мы выявілі месца, дзе некалькі невялікіх слядоў былі згрупаваныя ў хаатычным парадку», - кажа палеантолаг з Універсітэта Уэльба, вядучая аўтарка даследавання Эдуарда Маёраль, паведамляе «Вокруг Света».

У чэрвені 2020 года два біёлагі выявілі сляды на пляжы ў нацыянальным парку Даньяна пасля перыяду моцных штармоў і прыліваў. Навукоўцы знайшлі скамянелыя сляды буйных жывёл, такіх як алені або дзікі. І нашмат пазней, калі каманда Маёраля прааналізавала ўсю мясцовасць, былі знойдзены сляды неандэртальцаў. «У той час ніхто не падазраваў пра сляды гамінідаў, якія пазней выявіла мая каманда, пасля таго, як мы дэталёва вывучылі ўсю паверхню», - кажа аўтар даследавання.

Знойдзеныя адклады з адбіткамі належаць да перыяду плейстацэну, прыкладна 106 тысяч гадоў таму. На гэта паказалі знойдзеныя паблізу каменныя прылады, таксама яны пацвердзілі, што рэгіён раней быў заселены неандэртальцамі. Гэтыя паляўнічыя-збіральнікі жылі ў Еўропе і на Блізкім Усходзе ў перыяд ад 400 тысяч да 40 тысяч гадоў таму. Даследнікі ўважаюць, што знойдзеныя сляды могуць быць самымі старымі слядамі неандэртальцаў з калі-небудзь выяўленых у Еўропе.

Раней паверхня, на якой былі знойдзеныя сляды, знаходзілася ўздоўж берага вадапою крыху далей углыб берага, чым на сённяшні дзень. «Верагодна, вада не была прэснай, а трохі саланаватай, бо мы знайшлі рэшткі крышталяў марской солі на паверхні, дзе былі выяўленыя сляды», - кажа аўтар.

Памеры і размеркаванне слядоў указваюць, што яны былі зробленыя групай з 36 неандэртальцаў, якія былі сваякамі. Сярод іх было 11 дзяцей і 25 дарослых, з якіх 5 жанчын, 14 мужчын і яшчэ 6 неандэртальцаў, чый пол не змаглі вызначыць.

Асаблівую цікавасць прадстаўляюць два самыя маленькія сляды, даўжынёй прыкладна 14 см, якія верагодна, пакінула дзіця 6 гадоў. Яны знаходзяцца сярод некалькіх іншых хаатычных слядоў, магчыма, таму што дзеці-неандэртальцы гулялі ў пяску на беразе, уважаюць навукоўцы.