Звесткі спадарожнікаў: Расея пабудавала ў акупаваным Крыме новы ваенны лагер
12- 18.04.2021, 13:59
- 7,866
Каля пасёлка Марфаўка размешчана больш за тысячу адзінак ваеннай тэхнікі.
Расейскія вайскоўцы ўладкавалі на тэрыторыі акупаванага Крыма новы палявы лагер.
Пра гэта са спасылкай на спадарожнікавыя здымкі паведамляе нямецкае выданне Spiegel.
Паводле ягоных звестак, новы лагер з'явіўся за 30 кіламетраў ад прыбярэжнага пасёлка Марфаўка.
Спадарожнікавыя здымкі датаваныя 15 сакавіка і 2 красавіка.
На больш ранніх фота тэрыторыя на поўдзень ад пасёлка яшчэ пустая, у той час як на пазнейшых відаць ужо блізу тысячы адзінак ваеннай тэхнікі і сотні вайсковых намётаў.
Акрамя таго, яшчэ адзін невялікі лагер размесцілі за некалькі кіламетраў на захад ад асноўнага.
Паводле звестак прадстаўніка місіі ЗША ў АБСЕ Кортні Острыен, Расея перакінула ў акупаваны Крым дадаткова ад 15 да 25 тысячаў сваіх вайскоўцаў.
Яшчэ адзін лагер быў зафіксаваны журналістамі на палігоне Пагонава пад Варонежам, недзе за 250 кіламетраў ад мяжы з Луганскай і Харкаўскай абласцямі.