Андрэй Шарэнда: яшчэ адно сведчанне агоніі рэжыму

Страх перад народам прабіваецца нават праз маскі на тварах міліцыі.

Учора ў кватэры актывіста «Еўрапейскай Беларусі» Андрэя Шарэнды прайшоў ператрус. Таксама на актывіста завялі крымінальную справу паводле артыкула 361.

Падрабязнасці Андрэй Шарэнда распавёў сайту Charter97.org:

- Учора а 16.30 да мяне дадому, дзе я жыву з дзецьмі, прыйшлі супрацоўнікі Ленінскага РАУС горада Берасця - для правядзення ператрусу. Яны проста ўварваліся і сунулі мне пад нос паперу з санкцыяй пракурора на ператрус.

Афіцыйнай прычынай ператрусу было паказана распачынанне крымінальнай справы паводле артыкула 361. Наколькі я зразумеў, іх напалохала маё інтэрв'ю пра сітуацыю з палітвязнямі, дарэчы, з маёй жонкай Палінай Шарэндай-Панасюк.

Міліцыянты адразу ж канфіскавалі навучальны кампутар сына, які мы нядаўна падарылі яму на дзень нараджэння. Таксама былі канфіскаваныя два мабільныя тэлефоны - мой і сына. Ніякіх папер на гэтыя рэчы мне пры гэтым не выдалі.

Мне прапанавалі паехаць у Ленінскі РАУС для дачы паказанняў паводле гэтай крымінальнай справы, я адмовіўся, спаслаўшыся на артыкул 27 Канстытуцыі, які дазваляе не сведчыць супраць сябе. У выніку яны проста склалі пратакол апытання, дзе зафіксавалі маю адмову.

Я мяркую, што тое, што адбылося - гэта яшчэ адно сведчанне агоніі рэжыму Лукашэнкі. Усе гэтыя крымінальныя справы, якія заводзяць на невінаватых людзей - проста апошняя адчайная спроба ўтрымацца ва ўладзе ўсякім коштам. Рэальнага ўплыву на настроі думак людзей і сітуацыю ў краіне ў Лукашэнкі ўжо няма. Людзі разумеюць, што рэжым дажывае апошнія месяцы.

Калі супрацоўнікі міліцыі ўвайшлі да мяне, нават праз маскі на іх тварах я ўбачыў страх. Яны былі напалоханыя нашмат больш, чым я, нерваваліся, рукі ў іх трэсліся. Гэта ўсё яшчэ раз пацвярджае: рэжым слабы, як ніколі. Усе гэтыя крымінальныя справы - апошняя спроба рэжыму захаваць сябе.

Але змена ўлады ўжо непазбежная, ніякія рэпрэсіі не спыняць працэсаў, запушчаных мінулым летам. Народ Беларусі ведае цяпер, што такое свабода, і будзе імкнуцца да яе.