18 траўня 2021, aўторак, 4:33
Сім сім, Хартыя 97!
Рубрыкі

«Беларус адказаў на званок, а на яго аформілі крэдыт на 8 тысяч рублёў»

16
«Беларус адказаў на званок, а на яго аформілі крэдыт на 8 тысяч рублёў»

Экспэрты - аб новых схемах махляроў і як захаваць грошы.

Ад ашуканцаў у інтэрнэце пакутуюць людзі зусім рознага ўзросту, сацыяльнага статусу і ўзроўню адукацыі, распавяла на прэс-канферэнцыі прадстаўніца УУС Менскага аблвыканкама. Але ўсё ж асабліва ўразлівыя пенсіянеры, піша kp.by.

- Сёлета ў сталічным рэгіёне ахвярамі кіберзлачынстваў ужо сталі 157 пенсіянераў, - распавёў начальнік управы аховы правапарадку і прафілактыкі міліцыі грамадскай бяспекі Андрэй Бярозка.

Спецыялісты кажуць, што перакананне і ветлівасць у размовах з пацярпелымі ў спалучэнні з бесклапотнасцю і залішняй даверлівасцю дазваляе злачынцам атрымліваць асабовыя звесткі і выкарыстоўваць іх у сваіх ашуканскіх схемах.

У I квартале 2021 года было зарэгістравана амаль у 4 разы больш крадзяжоў грошай праз інтэрнэт у параўнанні з тым жа перыядам год таму. Суадносіны прыкладна 800 да 210, прывёў лічбы начальнік управы ў супрацьдзеянні кіберзлачыннасці крымінальнай міліцыі Дзмітрый Дудко.

Адзін з асноўных спосабаў крадзяжу грошай - званкі ад ашуканцаў, якія прадстаўляюцца супрацоўнікамі банка і пераконваюць беларусаў паведаміць звесткі аплатнай карты.

- Адзін з апошніх прыкладаў: жыхару Маладзечанскага раёна патэлефанавалі з нумара, які належыць аператару з Марока. Прадставіліся службай бяспекі банка і паведамілі, што па карце заўважаная падазроная аперацыя, і «ў мэтах бяспекі» вымусілі чалавека паведаміць розныя звесткі - нумар карты і смс-паведамленні, якія прыходзяць з кодам з банка, - распавядае Дзмітрый Дудко. - Размова ішла некалькі гадзін, некалькі разоў размова перарывалася: чалавек быў заняты - рамантаваў аўто ў гаражы. Пасля гэтага ашуканцы аформілі заяўку на онлайн-крэдыт на 8 тысяч беларускіх рублёў, якія перавялі на замежны рахунак. Чалавеку сказалі, каб ён заўтра падышоў у банк. Ён прыйшоў і даведаўся пра крэдыт.

Яшчэ адзін прыклад - жыхарка Менскага раёна на просьбу «аператара банка» (а напраўду махляра) усталявала прыкладанне для аддаленага доступу і паведаміла ўсе звесткі, што дазволіла ашуканцам карыстацца яе тэлефонам і здзяйсняць аплаты. У выніку ў яе спісалі з карт-рахунку 19 тысяч беларускіх рублёў.

Яшчэ адзін момант, на якім акцэнтуе ўвагу спецыяліст, - лагін і пароль мабільнага або інтэрнэт-банкінгу.

- Як правіла, гэтыя звесткі трапляюць зламыснікам праз шкоднаснае праграмнае забеспячэнне, якое выкарыстоўваецца на кампутарах. Бестурботнасць грамадзян, якія не выкарыстоўваюць антывірусы, а пароль у інтэрнэт-банкінгу выкарыстоўваюць той жа, што і на форумах і сацсетках, прыводзіць да сумных момантаў.

Яшчэ адзін спосаб падману такі: чалавек прадае рэч у інтэрнэце, з імі звязваюцца зламыснікі, якія кажуць, што гатовыя набыць тавар, але аплацяць яго онлайн.

- Адпраўляюць чалавеку спасылку, у якой ёсць форма для ўводу звестак банкаўскай карты. Нібыта такім чынам вы прывяжаце картку, і пакупнік зможа аплаціць куплю, - распавядае Дзмітрый. - Мы прадаўжаем працаваць па крымінальнай справе і шукаем усіх пацярпелых ад двух жыхароў Менскага раёна, якія арганізавалі такую дзейнасць: стварылі робата, сабралі групу махляроў і аплачвалі ім пэўны адсотак за тое, што тыя змушалі грамадзян перадаваць рэквізіты картак, з якіх потым адбываўся крадзеж. Паводле папярэдніх звестак, сума шкоды склала больш за 189 тысяч беларускіх рублёў, пацярпелых у Беларусі больш за 350.

«Калі не плаціце онлайн - сатрыце тры лічбы на абароце карты»

У міліцыі нагадваюць, што нельга паведамляць свае звесткі праз тэлефон. Калі вам тэлефануюць і кажуць, што па карце правялі аперацыю і яе трэба тэрмінова заблакаваць, праверыць гэтую інфармацыю можна ў мабільным або інтэрнэт-банкінгу ці ж патэлефанаваць у банк і ўдакладніць, ці сапраўды такая аперацыя праводзілася. Даведацца нумар банка можна на сайце або на банкаўскай картцы.

- Для онлайн-аплат мы раім выкарыстоўваць асобную картку (не з заробкам), - кажа Дзмітрый Дудко. - Яшчэ адна рэкамендацыя - устаноўка дзённага ліміту па карце, больш якога банк не дазволіць спісаць за 24 гадзіны. А для тых, хто не плаціць карткай у інтэрнэце, мы раім прыбраць трохзначны нумар з адваротнага боку банкаўскай карты. Гэта дапаможа захаваць грошы, калі згубіце партманэт.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».