Унёсак нафтакалійнага экспарту ў ВУП Беларусі ў першым квартале блізкі да нуля

Парадаксальная сітуацыя.

Насуперак глабальнаму ўздыму коштаў сыравінных тавараў, унёсак нафтакалійнага экспарту ў рост ВУП у першым квартале гэтага года ў Беларусі знаходзіцца на ўзроўні блізу нуля. Пра гэта паведаміў сёння дырэктар Даследчага цэнтра ІПМ Аляксандр Чубрык падчас выступу на прэс-сняданку «(Ня)пэўнасць, (не)стабільнасць і (не)давер: эканоміка і яе перспектывы ў ацэнках беларускага бізнэсу», паведамляе officelife.media.

Пры гэтым калій мы вырабляем на мяжы вытворчых магутнасцяў, а нафта - 18 млн т - гэта нейкая столь, якую мы можам сабе дазволіць. Унёсак гэтых фактараў праз эфект нізкай базы неўзабаве сябе вычарпае.

Сёлета дынаміка коштаў сыравінных тавараў на сусветным рынку поўная аптымізму: у сакавіку індэкс сыравінных коштаў угнаенняў (уключае 3 тыпы ўгнаенняў) перавысіў дакавідны ўзровень на 60%. А што адбываецца з коштамі беларускага калію? Яны ніжэйшыя за дакавідны ўзровень, і гэта наводзіць на змрочныя думкі, і не толькі ад калію, разважае экспэрт.

У сусветную эканоміку былі ўліты велічэзныя грошы, і ўсе сыравінныя цэны растуць цяпер проста шалёнымі тэмпамі, а беларускі экспарт (у сярэдніх цэнах) толькі ў лютым адштурхнуўся ад нуля ў тэмпах росту, і гэта з улікам таго, што там ёсць нямала сыравінных тавараў. Фізічныя аб'ёмы экспарту растуць вельмі хутка - толькі на 20% у студзені. Але кошты экспарту доўгі час падалі, а цяпер - у лютым выраслі крыху больш за нуль. У гэты час цэны імпарту выраслі значна больш.

Такім чынам, умовы гандлю для Беларусі з траўня 2020 года пагаршаюцца. Спрадаўшы танна прадукцыю цяпер, закупляць сыравіну і камплектуючыя ў новым вытворчым цыкле давядзецца новымі коштамі, ад чаго перспектывы фінансавага становішча прадпрыемстваў застаюцца пад пытаннем, канстатуе Чубрык.

Росту эканомікі бракуе крыніц: камерцыйнае крэдытаванне мае адмоўны ўнёсак у ВУП, у бюджэце няма свабодных рэсурсаў, у прадпрыемстваў няма адпаведных рэсурсаў, няма інвестыцый замежных інвестараў, высокі кошт рэсурсаў на ўнутраным рынку, недаступныя рэсурсы на замежным рынку.

У гэтым кантэксце рост фізічных аб'ёмаў выпуску і экспарту, нават аднаўленне ВУП мала кажуць пра перспектывы эканомікі, падсумаваў экспэрт.