«Памёр ад раненняў»: памёр дыктатар, які доўга знаходзіўся ва ўладзе

Нядаўна ён «пераабраўся» на шосты тэрмін.

Памёр пераабраны ў аўторак на шосты тэрмін прэзідэнт Чада Ідрыс Дэбі Ітна. Пра гэта паведамілі вайскоўцы ў эфіры дзяржаўнай тэлевізіі Чада, паведамляе AFP.

«Прэзідэнт рэспублікі, кіраўнік дзяржавы, вярхоўны галоўнакамандуючы ўзброеных сілаў Ідрыс Дэбі Ітна толькі што выпусціў свой апошні ўздых, абараняючы тэрытарыяльную цэласнасць на полі бою. Мы з глыбокай горыччу паведамляем народу Чада пра смерць у аўторак, 20 красавіка 2021, маршала Чада», - заявіў афіцыйны прадстаўнік войска, генерал Азем Бермандаа Агуна ў эфіры мясцовага тэлеканала.

Ідрысу Дэбі было 68 гадоў. Ён кіраваў краінай з 1990 года, прыйшоўшы да ўлады ў выніку ўзброенага перавароту. У 1991 годзе быў абраны прэзідэнтам Чада, і з таго часу пераабіраўся на гэтую пасаду на кожных прэзідэнцкіх выбарах.

Апошнія выбары прайшлі ў Чадзе 11 красавіка. Папярэднія вынікі, апублікаваныя 19 красавіка, паказалі, што Ідрыс Дэбі «перамог» на выбарах, набраўшы 79% галасоў.

Што адбылося ў Чадзе?

За два дні да выбараў, 9 красавіка гэтага года, міністэрства ўнутраных спраў Чада абвясціла пра раскрыццё змовы з мэтай замаху на палітыкаў і нападаў на выбарцаў, некалькі чалавек былі арыштаваныя.

11 красавіка ў Чад увайшлі ўзброеныя атрады паўстанцкай групоўкі «Фронт за перамены і згоду ў Чадзе» (FACT). Урадавыя войскі, якія ўключалі бранятанкавыя падраздзяленні, сустрэлі паўстанцкія калоны 17 красавіка ў 300 кіламетрах на поўнач ад Нджамены і распляжылі іх. Былі забітыя больш за 300 паўстанцаў, яшчэ 150 узятыя ў палон. Аперацыяй кіраваў Ідрыс Дэбі. Падчас яе ён і быў смяротна паранены.