Палітычны крызіс у Грузіі: кіруючая партыя і апазіцыя падпісалі пагадненне

Пагадненне падпісанае пры пасярэдніцтве Еўразвязу.

Кіруючая партыя Грузіі і апазіцыя падпісалі пагадненне для заканчэння палітычнага крызісу ў краіне. Пра гэта паведамляе Newsgeorgia.

Пагадненне падпісанае пры пасярэдніцтве Еўразвязу. Кіраўнік Еўрапейскай рады Шарль Мішэль адзначыў, што гэта толькі «адпраўная кропка» для працы па ўмацаванні дэмакратыі ў Грузіі і прасоўвання краіны да еўраатлантычнай будучыні. Мішэль таксама заявіў, што 21 красавіка асабіста прыедзе ў Грузію.

У адпаведнасці з пагадненнем, апазіцыя ўвойдзе ў парламент, а кіруючая партыя Грузінская мара правядзе новыя парламенцкія выбары, калі не атрымае па меншай меры 43% галасоў на муніцыпальных выбарах у 2021 годзе. Таксама праект пагаднення прадугледжвае амністыю для ўсіх фігурантаў спраў аб беспарадках падчас мітынгу ў чэрвені 2019 года.

Прадстаўнікі самай буйной апазіцыйнай партыі Адзіны нацыянальны рух адмовіліся падпісаць пагадненне, заявіўшы, што не зробяць гэта, калі старшыня АНР Ніка Мелія не выйдзе на волю. Мелія абвінавацілі ў арганізацыі і кіраванні групавым гвалтам падчас пратэстаў у Тбілісі ў 2019 годзе.

Палітычны крызіс у Грузіі пачаўся пасля перамогі партыі ўлады Грузінская мара на парламенцкіх выбарах 31 кастрычніка 2020 года. Апазіцыя заявіла аб маштабных фальсіфікацыях вынікаў галасавання і паабяцала пратэставаць, пакуль не прызначаць датэрміновыя выбары.