Чэхія адмовілася ад намераў набыць расейскую вакцыну «Спутнік V»
1- 20.04.2021, 20:37
- 1,986
Чэхія засяродзіцца на вакцынах, якія ўхваліла Еўрапейскае агенцтва лекавых сродкаў.
Чэхія адмовілася ад планаў набыць расейскую вакцыну ад каранавіруса «Спутнік V». Пра гэта паведаміў першы віцэ-прэм'ер і кіраўнік МУС Чэхіі Ян Гамачак, які часова выконвае таксама абавязкі міністра замежных спраў краіны, на прэс-канферэнцыі 19 красавіка, адзначае Ceske Noviny.
20 красавіка Гамачак павінен быў наведаць Маскву для абмеркавання паставак «Спутніка V» у Чэхію. Пра гэта ён паведаміў яшчэ 14 красавіка ў сваім Twitter.
«Мы шукаем вакцыны па ўсім свеце. Мы гатовыя купляць AstraZenec з Даніі. У панядзелак вылятаю ў Маскву, дзе хачу арганізаваць магчымыя пастаўкі Sputnik V пасля яго адабрэння Еўрапейскім агенцтвам лекавых сродкаў», - пісаў ён.
Sháníme vakcíny po celém světě. Jsme ochotni odkoupit AstraZenecu z Dánska. Já v pondělí odlétám do Moskvy, kde chci dojednat případné dodávky Sputniku V po jeho schválení Evropskou lékovou agenturou.
— Jan Hamáček (@jhamacek) April 14, 2021
Аднак 17 красавіка ён паведаміў, што не зможа прыехаць у Маскву праз неабходнасць удзельнічаць у пасяджэнні чэшскага ўрада 20 красавіка. А ўжо на наступны дзень Чэхія абвясціла пра высылку расейскіх дыпламатаў.
K mé plánované cestě do Moskvy - včera jsme se s panem premiérem dohodli, že je nutná má účast na pondělním jednání vlády.
— Jan Hamáček (@jhamacek) April 17, 2021
18 красавіка Гамачак заявіў выданню Denik N, што яго візіт у Маскву з самага пачатку быў «манеўрам прыкрыцця», каб схаваць падрыхтоўку да высылкі супрацоўнікаў пасольства Расеі ў Чэхіі. Ён паведаміў, што загадзя ведаў, што ў Расею не паляціць.
19 красавіка на прэс-канферэнцыі Гамачак адзначыў, што цяпер дыскусій з нагоды закупаў расейскай вакцыны ўлады Чэхіі не вядуць. На яго думку, Чэхія павінна засяродзіцца на вакцынах, якія ўхваліла Еўрапейскае агенцтва лекавых сродкаў - расейскага «Спутніка V» сярод іх няма.