Байдэн заклікаў да ўзаемнага прызнання паміж Сербіяй і Косавам
2- 21.04.2021, 16:35
- 1,584
Прышціне гэта неабходна для поўнай інтэграцыі ў еўраатлантычныя інстытуты.
Прэзідэнт Злучаных Штатаў Джо Байдэн заклікаў Сербію і Косава да нармалізацыі стасункаў і ўзаемнага прызнання.
Пра гэта гаворыцца ў яго лісце новаму прэзідэнту Косава Вьесе Асмані, паведамляе «Еўрапейская праўда» са спасылкай на Euractiv.
«Злучаныя Штаты будуць прадаўжаць падтрымліваць намаганні для забеспячэння трывалага міру праз прадуктыўны дыялог паміж Косавам і Сербіяй і, у канчатковым выніку, усёабдымнага пагаднення аб нармалізацыі, якое, як мы думаем, павінна быць засяроджанае на ўзаемным прызнанні», - заявіў Байдэн.
З ягоных слоў, нармалізацыя стасункаў з Сербіяй неабходная Косаву для рэалізацыі свайго патэнцыялу і поўнай інтэграцыі ў еўраатлантычныя інстытуты.
Прэзідэнт ЗША сказаў, што з нецярпеннем чакае магчымасці працаваць з Асмані «над агульнымі прыярытэтамі для Косава, уключаючы ўмацаванне вяршэнства закона; барацьбу з карупцыяй; абарону правоў этнічных і рэлігійных меншасцяў; аднаўленне пасля пандэміі COVID-19; садзейнічанне эканамічнаму развіццю; і бяспеку ўстойлівай энэргетычнай будучыні».
Байдэн ужо пісаў Асмані ў лютым, у 13-я ўгодкі абвяшчэння незалежнасці Косава, і прэзідэнту Сербіі Аляксандру Вучычу, каб павіншаваць яго з Днём дзяржаўнасці. У абодвух лістах ён заклікаў да дасягнення ўсёабдымнага пагаднення, якое павінна прывесці да ўзаемнага прызнання.