Стала вядома, калі «скіфскае золата» вернецца ва Украіну

Кіеў упэўнены, што станоўчая пастанова апеляцыйнай інстанцыі не стане апошнім пунктам у справе.

У той жа час у МЗС Украіны мяркуюць, што пасля вынясення пастановы Апеляцыйным судом Амстэрдама Расея будзе звяртацца ў іншыя судовыя інстанцыі для зацягвання вяртання Украіне антычных каштоўнасцяў, паведамляе unian.net.

Апеляцыйны суд Амстэрдама да канца жніўня мае намер абвясціць пастанову паводле справы аб экспанатах выставы «Крым - залаты востраў у Чорным моры», вядомых як «скіфскае золата», якія перад акупацыяй Расеяй Крыма дэманстраваліся ў Нідэрландах у музеі Аларда Пірсана.

Пра гэта ў Facebook паведаміў намеснік міністра замежных спраў Украіны Яўген Енін.

«Скончылі сённяшняе пасяджэнне апеляцыйнага суда г. Амстэрдама аб вяртанні ва Украіну часткі нашага культурнай спадчыны «скіфскага золата». Суддзі плануюць абвясціць пра сваю пастанову ўжо ў найбліжэйшыя месяцы, да канца жніўня», - заявіў Енін.

Намеснік міністра адзначыў, што ў час сваіх выступаў чальцы ўкраінскай дэлегацыі адзначалі, што гаворка ідзе не толькі пра гістарычныя артэфакты, але і пра сусветны парадак і сістэму міжнароднага права.

«Мы ўбачылі чарговыя спробы Расеі разбураць міжнароднае права гібрыднымі метадамі, у ход ішла адкрытая хлусня (аб безпяціхвілінным міжнародным прызнанні «рэспублікі Крым»), спасылкі на законы, якіх не існуе, накшталт савецкіх, «слёзы крымскіх дзяцей, якія хочуць хутчэй убачыць золата ў сябе дома» і інш. Была нават асобная падзяка «цара-бацюшкі» за заснаванне музеяў у Крыме», - сцвярджае Енін.

«Фантомныя кіраўнікі так званых крымскіх музеяў пры гэтым не могуць адказаць на элементарнае пытанне: яны прадстаўляюць Украіну (уладальніка каштоўнасцяў) або дзяржаву-акупанта? Але злодзей, які ўкраў рэч, не становіцца яе ўладальнікам! Мы заклікалі нідэрландскае правасуддзе не дапусціць парушэння Канвенцыі ЮНЕСКА 1970 года шляхам перадачы культурнай спадчыны Украіны дзяржаве-агрэсару! Пара давесці, што нормы маюць значэнне, правілы маюць значэнне, тэрытарыяльная цэласнасць таксама мае значэнне», - падкрэсліў намеснік міністра.

У той жа час, як адзначыў Енін, нават станоўчая пастанова апеляцыйнай інстанцыі Амстэрдама не стане апошнім пунктам у справе.

«РФ будзе максімальна зацягваць працэс, як і ў дзясятках іншых міжнародных судоў і арбітражаў. Але нас не спыніць, і РФ гэта моцна не дапаможа. Рана ці позна злодзею давядзецца плаціць па рахунках», - адзначыў Енін.