Навукоўцы ўпершыню дэталёва вывучылі ўплыў кавы на мозг

Спецыялісты ўпершыню ўжылі тэхналогію функцыянальнай магнітна-рэзананснай тамаграфіі.

Міжнародная група навукоўцаў упершыню падрабязна апісала змены, якія адбываюцца ў мозгу людзей, якія рэгулярна ўжываюць каву. Вынікі іх працы былі апублікаваныя ў часопісе Molecular Psychiatry.

Як вядома, кава паляпшае ўвагу, павышае паказчыкі агульнай маторыкі, навучання і памяці. Кафеін прыводзіць да ўзбуджэння цэнтральнай нервовай сістэмы, павышае фізічную цягавітасць, нармалізуе ўзровень трывожнасці.

Пры гэтым нейрабіялагічныя прычыны гэтых эфектаў дагэтуль падрабязна не вывучалі.

Спецыялісты медыцынскага факультэта партугальскага Універсітэта Мінью разам з калегамі з Орхускага ўніверсітэта ў Даніі ўпершыню ўжылі тэхналогію функцыянальнай магнітна-рэзананснай тамаграфіі, каб параўнаць актыўнасць мазгавых сувязяў у людзей, якія ўжываюць каву штодня, і тых, хто зусім яе не п'е.

У першую групу ўвайшоў 31 чалавек, у другую - 24.

У ходзе даследавання было ўстаноўлена, што ў аматараў кавы ўзмоцненая сувязь паміж таламусам і мазжачком, якая адказвае за маторны кантроль.

Акрамя таго, у іх выявілі павышаную дынамічную актыўнасць паміж некалькімі мазжачковымі і падкоркавымі абласцямі - мазжачком, паласатым целам, таламусам, парагіпакампальнай, лінгвальнай і ніжняй патылічнай звілінамі.

На думку даследчыкаў, гэтая актыўнасць тлумачыць такія эфекты, як павышэнне засяроджанасці і ўвагі, а таксама паляпшэнне навучання і памяці.

Падкрэсліваецца, што такія ж структурныя змены ў мазгавых сувязях назіраліся і ў тых, хто звычайна не п'е кавы, неўзабаве пасля таго, як яны выпівалі кубак напою. З гэтага можна зрабіць выснову, што змены, выкліканыя ў мозгу кафеінам, верагодна, носяць кароткачасовы характар.