Прэм'ер Чэхіі: Масква знішчыла нашы ўзаемаадносіны
4- 23.04.2021, 19:03
- 4,792
Андрэй Бабіш чакае жорсткай рэакцыі краін ЕЗ на выбухі ў Врбетыцэ.
Расея, арганізаваўшы выбухі на складах са зброяй, знішчыла стасункі з Чэхіяй, якія і без гэтага былі ў «пункце замярзання». Прага зацікаўленая толькі ў сумленных дачыненнях з Крамлём.
Пра гэта ў інтэрв'ю denik.cz завіў прэм'ер-міністр Чэхіі Андрэй Бабіш.
«Тое, што адбылося - абуральна. Расея мела магчымасць выправіць сітуацыю, але не скарысталася ёю. Масква разбурыла нашы ўзаемаадносіны, якія зараз знаходзяцца ў пункце замярзання. Чэхія зацікаўлена ў сумленных дачыненнях з Расеяй як паміж дзвюма суверэннымі дзяржавамі», - сказаў Бабіш.
Ён адзначыў, што пасля найбліжэйшага пасяджэння Еўрапейскай рады ён чакае жорсткай рэакцыі краін ЕЗ на выбухі ў Врбетыцэ.
«Еўрапейская рада адбудзецца 7 траўня, дзе я выступлю перад нашымі партнёрамі, каб прадэманстраваць салідарнасць. Я ўпэўнены, што ад іх паступіць выразны адказ, і ён не абмяжуецца толькі вуснымі заявамі. Я думаю, што гэтага чакае не толькі ўрад, але і ўсе грамадзяне Чэхіі», - сказаў кіраўнік чэшскага ўрада.