Золатавалютныя рэзэрвы Беларусі ўпалі ніжэй за «псіхалагічную» рысу
8- 7.04.2021, 10:33
- 8,234
Скарачэнне ЗВР ідзе трэці месяц запар.
Міжнародныя рэзэрвовыя актывы Беларусі на 1 красавіка 2021, паводле папярэдніх звестак, упалі ніжэй за «псіхалагічную» рысу 7 млрд даляраў і склалі 6,940 млрд даляраў (у эквіваленце), знізіўшыся за сакавік на 174,5 млн даляраў (на 2,5%) пасля скарачэння ў лютым на 88,9 млн даляраў.
З пачатку года золатавалютныя рэзэрвы скараціліся на 7,3%, піша tut.by.
Зніжэнне ўзроўню міжнародных рэзэрвовых актываў за сакавік збольшага абумоўленае планавай аплатай урадам замежных і ўнутраных абавязанняў у замежнай валюце на суму блізу 310 млн даляраў, а таксама памяншэннем вартасці манетарнага золата, растлумачылі ў Нацбанку.
Падтрыманню ўзроўню золатавалютных рэзэрваў у сакавіку спрыялі паступленне замежнай валюты ў бюджэт, у тым ліку ад продажу Міністэрствам фінансаў аблігацый, намінаваных у замежнай валюце, а таксама купля Нацыянальным банкам замежнай валюты на таргах ААТ «Беларуская валютна-фондавая біржа».
Згодна з Асноўнымі кірункамі грашова-крэдытнай палітыкі на 2021 год сума міжнародных рэзэрвовых актываў на 1 студзеня 2022 года мае скласці не менш за 6 млрд даляраў. Такое зніжэнне запланаванае з улікам неабходнасці выплат сёлета дзяржавай валютнай запазычанасці на суму 3,3 млрд даляраў.
За 2020 год золатавалютныя рэзэрвы страцілі 1,9 мільярда даляраў.