Мэркель запатрабавала ад Пуціна спыніць вайсковае нарошчванне на мяжы з Украінай
15- 8.04.2021, 17:10
- 13,300
Адбылася тэлефонная размова паміж канцлеркай Нямеччыны і прэзідэнтам Расеі.
Канцлерка Нямеччыны Ангела Мэркель запатрабавала ў тэлефоннай размове з прэзідэнтам Расеі Уладзімірам Пуціным, каб РФ спыніла нарошчванне вайсковай моцы ля ўкраінскіх межаў.
Пра гэта гаворыцца ў заяве ўрада Нямеччыны ў чацвер, якую цытуе агенцтва Reuters, піша «Еўрапейская праўда».
«Напрыклад, гаворка ішла пра ўзмацненне вайсковай прысутнасці ў ваколіцах Усходняй Украіны», - гаворыцца ў заяве.
«Канцлерка запатрабавала, каб гэта нарошчванне было згорнутае, каб знізіць эскалацыю сітуацыі», - заявіла прэс-служба ўрада.
Прэс-служба Крамля раней у сваім паведамленні аб выніках размовы заявіла, што Пуцін у тэлефоннай размове з Мэркель абвінаваціў Кіеў у правакацыях і мэтанакіраваным абвастрэнні сітуацыі на лініі судакранання на Данбасе.
Сітуацыя на Данбасе абвастрылася ў канцы сакавіка. Акрамя таго, Расея ажыццяўляе нарошчванне сваіх войскаў ля межаў Украіны.
8 красавіка Уладзімір Зяленскі прыехаў з рабочым візітам на ўсход Украіны.
Намеснік кіраўніка адміністрацыі прэзідэнта Расеі Дзмітрый Козак, які ўдзельнічае ў нармандскіх перамовах у ролі палітычнага дарадцы, 8 красавіка заявіў, што пачатак Кіевам баявых дзеянняў на Данбасе можа прымусіць Расею стаць на абарону сваіх грамадзян і стаць «пачаткам канца Украіны».