Пробашч парафіі паказаў, як выглядае касцёл у Будславе пасля пажару
3- 12.05.2021, 11:44
- 3,436
Фотафакт.
Пробашч будслаўскай парафіі ксёндз Дзмітрый Дубовік апублікаваў на сваёй старонцы ў Facebook фатаграфіі, зробленыя ўнутры касцёла пасля пажару.
На падлозе бачныя лужыны, на зводах і сценах храма - падцёкі.
Напярэдадні Дзмітрый Дубовік распавядаў, што так званы «стары касцёл», які знаходзіцца за алтарнай часткай святыні, полымя не закранула «а вось у касцёле - арган мокры, алтар мокры, мокры ўвесь жывапіс». Яго словы падае сайт Catholic.by.
Сёння з раніцы прыхаджане планавалі прыйсці ў касцёл, каб прывесці яго ў парадак пасля пажару.
«Унутры поўна вуглёў і вады», - казаў напярэдадні Дзмітрый Дубовік.
Храм загарэўся раніцай у аўторак. З агнём удалося справіцца толькі ў другой палове дня. На дапамогу мясцовым пажарным прыязджалі ратавальнікі са сталіцы. Згарэў дах. Следчы камітэт распачаў паводле факту пажару 11 траўня ў касцёле ў Будславе крымінальная справа. Справа адкрытая паводле артыкула «Парушэнне правілаў пажарнай бяспекі асобай, адказнай за іх выкананне» (ч. 2 арт. 304 КК РБ). Максімальнае пакаранне паводле гэтага артыкула - 3 гады калоніі.