ЗША выключылі з чорнага спісу буйнога кітайскага вытворцу смартфонаў
6- 12.05.2021, 16:15
- 4,760
Папярэдняя адміністрацыя падазравала кітайскую кампанію ў супрацоўніцтве з вайсковымі кампаніямі КНР.
Злучаныя Штаты выключылі кітайскую Xiaomi з чорнага спісу ўрада. Пастанову пра ўключэнне ў спіс папулярнага вытворцу смартфонаў прыняла адміністрацыя папярэдняга прэзідэнта ЗША Дональда Трампа, піша «Новое время».
Папярэдняя адміністрацыя падазравала кітайскую кампанію ў супрацоўніцтве з вайсковымі кампаніямі КНР. Траплянне Xiaomi ў чорны спіс абавязвала амерыканскіх інвестараў адмовіцца ад інвестыцый у кампанію.
У дакументах гаворыцца, што бакі пагадзіліся развязаць судовы працэс без далейшага аспрэчвання.
«Называць Xiaomi кітайскай вайсковай кампаніяй заўсёды было недарэчна. Аднак для фірмаў, якія больш абгрунтавана падазраюцца ў сувязях з вайскоўцамі або Сіньцзянам, сітуацыя будзе больш складанай», - адзначыў прафесар Гарадскога ўніверсітэта Ганконга Дуг Фулер.
На фоне навін аб выключэнні Xiaomi з чорнага спісу акцыі кампаніі на Ганконгскай біржы выраслі на 6%. Адзначаецца, што з моманту ўнясення кампаніі ў чорны спіс яе акцыі страцілі ў кошце 20%.
Нагадаем, што ў сярэдзіне студзеня ЗША ўвялі санкцыі супраць Xiaomi і яшчэ васьмі кітайскіх кампаній. Акрамя вытворцы смартфонаў пад амерыканскія санкцыі таксама трапіў кітайскі канкурэнт Boeing і Airbus - авіябудаўнічая кампанія COMAC.
У лютым кітайская кампанія падала ў суд на Пентагон і Мінфін ЗША, спрабуючы аспрэчыць сваё траплянне ў чорны спіс і абвінавачванні ў супрацоўніцтве з вайсковай галіной КНР.
У сакавіку гэтага года федэральны суддзя часова заблакаваў унясенне Xiaomi ў чорны спіс, які спаслаўся на «глыбока памылковы» працэс унясення кампаній у гэты спіс.
Xiaomi не першая кітайская тэхнакампанія, якая трапіла ў санкцыйны спіс ЗША. У траўні 2019 ЗША ўключылі Huawei ў спіс санкцый Міністэрства гандлю, абмежаваўшы пастаўшчыкоў ад продажу амерыканскіх тавараў і тэхналогій кітайскай кампаніі. 14 траўня 2020 года ЗША прадоўжылі санкцыі супраць Huawei яшчэ на год. У ліпені 2020 ЗША абвясцілі Huawei пагрозай нацыянальнай бяспецы.