«Праца становіцца невыноснай»: падпалкоўнік міліцыі распавёў праўду пра сітуацыю сярод сілавікоў

Калі збярэцца крытычная маса - яны могуць перайсці на бок народа.

Падпалкоўнік міліцыі Аляксандр Азараў, які перайшоў на бок народа, у інтэрв'ю «Белсату» расказаў аб рэальным становішчы спраў у сілавых органах:

- Цяпер сістэма стамілася ад барацьбы са сваім народам. Людзям сорамна. У першыя дні, я памятаю, форму трэба было ў пакет схаваць і везці, каб ніхто не бачыў. І потым апранаць яе на працы. Людзям сорамна. У грамадзянскіх арганізацыях працуюць усе яго сваякі, сябры і знаёмыя, якія ведаюць, што адбываецца, яму ўвесь час пра гэта кажуць.

Я ведаю, што многія разрывалі стасункі. Але яны не бачаць сваёй будучыні без працы ў міліцыі. На сённяшні момант яны мяркуюць, што пасля звальнення іх ніхто на працу не возьме. Таксама ў іх шмат крэдытаў, розных праблем, жонкі ў дэкрэтах і гэтак далей. Іх цяпер сталі заганяць у такія рамкі, што праца становіцца невыноснай. Пры ўсякім падазрэнні яны рэгулярна праходзяць паліграф.

У тым жа ГУБАЗіК паліграф прайшлі работнікі, якія не праявілі сябе і не білі грамадзян на вуліцах. Частку з іх перавялі ў іншыя падраздзяленні. Кагосьці адправілі на пенсію і г.д. Яны імкнуцца пазбавіцца ад такіх. Ім патрэбныя цяпер толькі тыя, хто запэцкаў сябе і каму адступаць больш няма куды, таму ён будзе надалей чыніць злачынствы. У іх рэгулярна правяраюць мабільныя тэлефоны, прымушаюць падпісвацца на праўладныя каналы.

Многія маюць некалькі тэлефонаў, дома - адзін тэлефон, на працы - другі, пусты. Людзі самаразвіваюцца. Я ведаю, што многія імкнуцца таемна атрымаць нейкую прафесію. Здаць на пасведчанне кіроўцы, каб з'ехаць пры магчымасці, але цяпер іх там загналі ў такія рамкі, што ўсім забаранілі выезд.

І я ведаю, што работнікі, якія спрабавалі паляцець у адпачынак, не ведалі, што ім забаронена пакідаць Беларусь. Іх здымалі з самалётаў, а сям'я ляцела.

А ў КДБ забарона дзейнічае не толькі для работнікаў, але і для сваякоў нават. Яны цяпер абмежаваныя ва ўсім.

Аляксандр мяркуе, што ў крытычны момант Лукашэнку будуць абараняць толькі тыя сілавікі, якія запэцкалі сябе злачынствамі:

- Усе астатнія - работнікі, якія сумняваюцца і якія цяпер моўчкі ходзяць на працу, могуць у пэўны момант, калі будзе сабраная крытычная маса народа, адмовіцца і перайсці на бок народа.