Па цэнтры Менска на досвітку шпацыраваў бабёр

Што з ім здарылася?

Па цэнтры Менску сёння ўначы і раніцай шпацыраваў бабёр: гэта заўважылі адразу некалькі мінакоў. Відавочна, гэтага ж звера яшчэ ў красавіку бачылі ў парку Горкага.

Партал tut.by расказаў, што з ім здарылася далей.

Пад раніцу непадалёк ад плошчы Перамогі бабра заўважыў карыстальнік інстаграма andrey_babyk.

Потым за прыгодамі жывёлы ў горадзе назіраў Яўген Клёц, жыхар дома на бульвары Мулявіна, што побач з плошчай Якуба Коласа. Вось відэа бабровага шпацыру.

- Раніцай, а 4.30, прачнуўся ад гучнага каркання, - распавёў TUT.BY Яўген. - Выйшаў на балкон - убачыў жывёліну з вялікім хвастом. Падумаў, што бабёр ў цэнтры горада раніцай - гэта неяк дзіўна. Надумаў выйсці паглядзець. Пакуль спускаўся, бабёр перамясціўся ў іншае месца - знайшоў яго, зноў жа, бо яго праводзілі вароны.

Устурбаваны лёсам жывёліны ў вялікім горадзе, Яўген патэлефанаваў у МНС.

- Мне спачатку не паверылі, потым папрасілі даслаць фота і відэа. Потым я вартаваў бабра, не даваў яму прайсці да праезнай часткі. А ён воплескаў і вокрыкаў не разумее, таму я шаркаў тэпцямі па асфальце - звер спыняўся і ішоў у другі бок. Але ён наогул добры таварыш, не агрэсіўны. Мы так з ім шпацыравалі гадзіны дзве, пакуль не прыехаў нейкі спецыяліст у ахове прыроды.

Пазней прыехаў яшчэ і спецтранспарт ад «Фауны горада». Бабра злавілі сачком і павезлі.

- Сказалі, што выпусцяць на волю, магчыма дзесьці ў Драздах, - дадаў Яўген. - Я рады, што прачнуўся так рана. Такое бывае не кожны дзень: горад спіць, а мы з бабром шпацыруем.

Мы высвятляем падрабязнасці, дзе бабёр жыве цяпер.

Бобр у цэнтры Мннска - гэта нармальна?

Бобр - гэта самы буйны грызун Еўропы. Вось што распавядаў пра жывёл Максім Нямчынаў, спецыяліст у прыродаахоўных пытаннях грамадскай арганізацыі «Ахова птушак Бацькаўшчыны»:

- Бобр у горадзе - варыянт нормы. Гэтыя жывёлы могуць даволі актыўна рассяляцца: часцей - маладыя, якія выганяюцца з тэрыторый бацькоў, але і больш дарослыя часам вымушаныя міграваць.

Спецыяліст тлумачыў, што такія бабры падарожнічаюць, у асноўным, па вадацёкам, якія адначасова для іх з'яўляюцца спосабам схавацца ад драпежнікаў.

- Вышукваюць прыдатны надзел, а пакуль яго не знойдуць, могуць быць і ў непрыдатных. Пры гэтым ступень прыдатнасці бабёр вызначае эмпірычна, спрабуючы пажыць на пляцы. Так што ў парку Горкага, хутчэй за ўсё, вось такі падарожнік. Умовы там далёкія ад аптымальных - магчыма, ён перамесціцца адтуль, але і цалкам выключыць магчымасць, што паспрабуе асесці, нельга.