СМІ раскрылі схему ўзбагачэння пляменніка кіраўніка Туркменістана

Краіна знаходзіцца ў глыбокім эканамічным крызісе апошнія некалькі гадоў, нягледзячы на багатыя запасы газу.

Пляменнік лідара Туркменістана нажываецца на харчовым крызісе ў краіне. Да такой высновы прыйшлі незалежныя туркменскія выданні Turkmen.news і Gundogar сумесна з Цэнтрам даследавання карупцыі і арганізаванай злачыннасці (OCCRP), паведамляе «Радио Свобода».

Гаворка ідзе пра 39-гадовага сына старэйшай сястры прэзідэнта Гурбангулы Бердымухамедава па імені Хаджымурат Рэджэп. Паводле звестак журналістаў, ён узначальвае нядаўна створаную брытанскую кампанію Greatcom Trade, якая на рашэнне дзядзькі-прэзідэнта атрымала кантракты на імпарт прадуктаў харчавання.

У сакавіку 2016 года Бердымухамедаў выдаў спецыяльны ўказ, які прадпісвае ўраду закупляць прадукты толькі праз гэтую фірму. Яна павінна была паставіць у Туркменію тоны цукру, кумпякоў, маргарыну, а таксама сланечнікавага алею і масла. Сума ўгоды склала 27,5 мільёнаў даляраў. Аналагічныя падазрэнні выклікала шатландская Intergold, праз якую ў краіну былі пастаўленыя кандытарскія вырабы на суму 3,5 мільёна даляраў.

Схема была арганізавана ва ўмовах вострага недахопу харчавання. Яна прывяла да ўзнікнення чэргаў па ўсёй краіне і спробаў камерцыйнай спекуляцыі: спрабуючы пракарміцца, людзі закуплялі прадукты рана ранкам і затым перапрадавалі іх.

Сітуацыя пагоршылася настолькі, што ўрад вымушаны быў увесці прадуктовыя карткі. Абмяняць іх на ежу можна толькі ў найбліжэйшых да месца прапіскі крамах. Субсідаваныя тавары адпускаюцца з 6 да 8 раніцы. Сярэдняя прадуктовая норма на чалавека ў месяц - гэта літр баваўнянага і сланечнікавага алею, а таксама па кілаграму цукру і рысу.

У апошнія месяцы прадуктовая норма ў шэрагу рэгіёнаў пачала скарачацца. У кастрычніку ў горадзе Мары яна складала два курыныя кумпякі на сям'ю і шэсць яек на чалавека. У красавіку ў горадзе Балканабад у месяц на сям'ю вылучалі адзін курыны акарачок, літр расліннага алею і 250 грамаў цукру.

У канцы мінулага месяца ўлады краіны забаранілі чэргі, прыстрашыўшы парушальнікам тым, што пазбавяць іх субсідаванай выдачы. Гэта адбылося фактычна на патрабаванне сына прэзідэнта: той паскардзіўся, што натоўпы ля крамаў дыскрэдытуюць бацьку.

Туркменія знаходзіцца ў глыбокім эканамічным крызісе апошнія некалькі гадоў, нягледзячы на багатыя запасы газу. Пандэмія пагоршыла крызіс. Улады, аднак, адмаўляюць і факт эканамічнай разрухі, i распаўсюджванне інфекцыі COVID-19.

Туркменія - адна з некалькіх краін свету, якія адмаўляюць пранікненне віруса на тэрыторыю дзяржавы. Нягледзячы на гэта, улады ўводзілі жорсткія карантынныя захады, а крыніцы ў краіне паведамлялі аб рэзкім росце колькасці хворых на пнеўманію і смяротнасці адначасова з пачаткам пандэміі.